Германияда дизель бағасы тарихи рекорд жаңартты

2 сәуір күні Германияда дизель отынының бағасы бүкіл ел бойынша литріне 2 еуро 34 центке дейін көтеріліп, жаңа рекорд орнатты. Бұл қатарынан екінші күнгі рекордтық көрсеткіш. Мұндай деректерді Германияның жалпыға ортақ автомобиль клубы (ADAC) жариялады.

Алдыңғы күнмен салыстырғанда баға 1,9 центке өскен. Осылайша 2022 жылдың көктеміндегі рекордтық деңгейден асып түсті. Сонымен қатар Super E10 маркалы бензин бағасы да өсіп, литріне 2,141 еуроға жетіп, биылғы ең жоғары деңгейін көрсетті.

Сарапшылардың айтуынша, баға рекорды жанармай құю бекеттеріндегі бағаны тұрақтандыруға бағытталған «австриялық модель» енгізілгеннен кейін тіркелген. Алайда бұл реттеу бағаны шектеудің орнына, керісінше, өсімге ықпал еткен.

Автомобиль клубының пікірінше, шикі мұнай бағасының өсуі бағаның қымбаттауын толық түсіндіре алмайды. Мұнай компаниялары болашақтағы тәуекелдерді алдын ала ескеріп, күнделікті бағаға қосып отырғаны байқалады.

Бағаның өсуіне негізгі себептердің бірі – АҚШ пен Иран арасындағы қақтығыс. Соның салдарынан Ормуз бұғазы арқылы еркін кеме қатынасы тоқтаған. Бұл бағыт арқылы әлемдік мұнайдың шамамен бестен бірі тасымалданатынын ескерсек, қысқа мерзім ішінде Brent маркалы мұнай бағасы барреліне 72 доллардан 120 долларға дейін өскен.

Соғыс басталғанға дейін, ақпан айының соңында Германиядағы жанармай бағасы қазіргі деңгейден 50-60 центке төмен болған.

Қарсы шара ретінде жүргізушілер энергия тасымалдаушыларға салынатын салықты Еуропалық одақтағы ең төменгі деңгейге дейін уақытша төмендетуді ұсынып отыр. Олардың пікірінше, бұл дизель мен бензин бағасын литріне шамамен 15 центке арзандатуы мүмкін.

Сонымен қатар Германияның Федералдық картельге қарсы ведомствосы бағаның негізсіз өсуіне жол бермеу үшін кеңейтілген өкілеттіктерін пайдалануы тиіс. 1 сәуірден бастап мұнай компаниялары бағаның көтерілу себептерін түсіндіруге міндеттелген.

Жаңа ережеге сәйкес, жанармай құю бекеттеріне тәулігіне тек бір рет – түскі уақытта бағаны көтеруге рұқсат етіледі. Ал бағаны төмендету кез келген уақытта мүмкін. Бұл шара тұтынушыларды негізсіз қымбаттаудан қорғауға бағытталған. Ережені бұзғандарға 100 мың еуроға дейін айыппұл салынуы мүмкін.

Алайда әзірге бұл шешім айтарлықтай нәтиже бермеген. Сарапшылардың айтуынша, компаниялар күн ішінде бағаны өзгерте алмайтындықтан, тәуекелдерді алдын ала бағаға енгізуге тырысады.

Бұған дейін қымбат дизель Германиядағы тасымал секторын дағдарысқа ұшыратып отырғаны хабарланған еді.