Грекиялық танкер КҚК терминалында мұнай тиелгеннен кейін шабуылға ұшырады

Қара теңізде Грекияның Skiros мұнай танкері Новороссийск маңындағы Каспий құбыр консорциумы (КҚК) терминалында мұнай тиегеннен кейін шабуылға ұшырады, деп хабарлайды Tengrinews.kz. Бұл туралы Bloomberg-ке жағдайдан хабардар дереккөздер мәлімдеді.

Дереккөздің мәліметінше, жексенбі, 16 тамызда КҚК терминалына жақын маңда танкерге ұшқышсыз ұшу аппараты шабуыл жасаған. Бұл кейінгі үш аптаға жуық уақыт ішінде КҚК терминалына кірген кемеге жасалған алғашқы шабуыл екені айтылады. Bloomberg агенттігі бұған дейін ұшқышсыз аппараттардың бірнеше соққысы терминал жұмысын бұзып, қазақстандық мұнай кен орындарын өндірісті азайтуға мәжбүр еткенін хабарлады.

Tengrinews.kz редакциясы танкердің қандай мұнай тасымалдағанын нақтылау үшін Каспий құбыр консорциумының баспасөз қызметіне хабарласты. КҚК баспасөз қызметі қазіргі уақытта операциялық қызметке және жөнелтілген мұнайдың кімге тиесілі екеніне қатысты сұрақтарға түсініктеме бермейтінін хабарлады.

Сондай-ақ Tengrinews.kz редакциясы Қазақстанның Энергетика министрлігіне пікір алу үшін жүгінді. Министрлік аталған танкер мен ондағы жүктің қазақстандық тарапқа қатысы жоқ екенін хабарлады.

Бұл ретте Bloomberg дереккөздері Skiros бортындағы жүк ресейлік мұнай екенін хабарлаған.

"Бұған дейін АҚШ өкілінің айтуынша, Украина КҚК инфрақұрылымы мен ресейлік емес мұнайды тасымалдайтын кемелерге шабуыл жасамауға келіскен, бірақ бұл кемелер украиналық санкциялар тізімінде болмауы және ресейлік жүк тасымалдамауы тиіс.

Бұл шабуыл КҚК жұмысының тұрақтылығына қатысты қауіпті қайта күшейтті. Шілденың аяғында танкерлерге жасалған бірнеше шабуылдан кейін, консорциум қауіпсіздік пен қоршаған ортаға төнетін қатерлерге байланысты жұмысын уақытша тоқтату мүмкіндігін де қарастырған, алайда операцияларды жалғастыру туралы шешім қабылдады", - делінген Bloomberg жарияланымында.

Equasis базасында Skiros кемесінің басқарушысы ретінде көрсетілген афиналық компания оқиға салдарынан зардап шеккендер мен мұнайдың төгілуі болмағанын хабарлады.

Қазақстан КҚК шектеулеріне байланысты мұнай экспорты үшін қосымша бағыттар іздестіріп жатыр

10 тамызда Қазақстан Каспий құбыр консорциумы тарапынан енгізілген уақытша шектеулер аясында мұнай экспорты үшін қосымша бағыттарды қарастырып жатқаны белгілі болды. Бұл туралы Қазақстан Энергетика министрлігінің ресми өкілі Әсел Серікпаева айтты.

Ресми мәлімет бойынша, биылғы шілдеде КҚК мұнай қабылдауды уақытша шектегендіктен, көлемнің бір бөлігін басқа бағыттарға қайта бағыттауға тура келген.

"Мұнай көлемінің бір бөлігі басқа тасымалдау бағыттарына, атап айтқанда Ақтау порты, Атасу – Алашанькоу бағыты, сондай-ақ Атырау – Самара бағыты бойынша қайта бағытталды", - деді Әсел Серікпаева.

Сондай-ақ Энергетика министрлігінің өкілі Қазақстанның қосымша экспорттық нұсқаларды қарастырып жатқанын атап өтті. Олардың қатарында Баку – Тбилиси – Джейхан мұнай құбыры, Каспий теңізі арқылы Әзірбайжан аумағымен тасымалдау және Баку – Супса бағыты бар.

Google News арқылы жаңалықтарымызды қадағалаңыз