Грузияның бұрынғы қорғаныс министрі сыбайлас жемқорлық үшін 10 жылға бас бостандығынан айырылды

Тбилиси соты Бурчуладзені қызмет өкілеттілігін теріс пайдалану және аса ірі көлемде ақшаны жылыстату бойынша кінәлі деп тапты. 

Сонымен қатар, оның отбасының мүлкін, соның ішінде Испаниядағы вилла және Тбилиси маңындағы Цкнети кентіндегі үйді тәркілеу туралы шешім қабылданды. Іс бойынша келтірілген залал шамамен 8 млн лариге (3 млн доллардан астам) бағаланды. Сондай-ақ оған екі жыл мемлекеттік қызметте жұмыс істеуге тыйым салынды.

Бұл іс басқалармен қатар әскери ауруханаға МРТ-аппаратын сатып алуға байланысты қозғалды. Тергеу нұсқасы бойынша, бір топ шенеунік бәсекелестікке жатпайтын жағдай жасап, келісімшарт бағасын 1,3 млн лариге көтерген.

Осы іс бойынша басқа да айыпталушылар сотталды. Қорғаныс министрінің бұрынғы орынбасары Георгий Хаиндрава және экс-министрдің туысы Васил Мхеидзенің сегіз жылға бас бостандығынан айыру жазасына кесілді. Тергеумен келісімге келген сатып алу департаментінің бұрынғы басшысы Владимир Гудушаури төрт жылға шартты түрде бас бостандығынан айырылды. Оған айыппұл салынып, қызметтен уақытша шеттетілді.

Джуаншер Бурчуладзенің өзі қызмет өкілеттігін теріс пайдалану эпизодтары бойынша кінәсін ішінара мойындады, бірақ ақшаны жылыстату айыптарын жоққа шығарды. Ол үкім шығару процесіне келмеді, ал оның қорғаушылары үкімге шағымдану ниетін мәлімдеді.

Бурчуладзе Ираклий Гарибашвили үкіметі кезінде, 2021-2024 жылдары қорғаныс министрі қызметін атқарды. Гарибашвили қаңтар айында заңсыз кірістерді заңдастыру бойынша кінәсін мойындап, бес жылға бас бостандығынан айырылды.

Ал 2025 жылдың наурызында Тбилиси қалалық соты бұрынғы президент Михаил Саакашвилиді 9 млн лари (шамамен 3,2 млн доллар) көлеміндегі бюджет қаражатын жымқырды деген айыппен 9 жылға бас бостандығынан айырды.