Хайуанаттар шыршаға қарық болды

Egemen.KZ дереккөзінен алынған мәліметтерге сүйене отырып, Qazaq24.com түсініктеме жасады..

Алматы хайуанаттар бағында «Шыршаны тапсыр» деп аталған ерекше экологиялық науқан мәреге жетті. Жоба аясында қала тұрғындары жаңа жылдық табиғи шырша, майқарағай, қарағай ағаштарын хайуанаттар бағына өткізіп, жануарлардың мекен ету ортасын жақсартуға атсалысты.

Жиналған ағаштарды тұяқты жануарлардың кей түрлері азық ретінде пайдаланса, маймыл, жолбарыс, аю мен леопардтарға «ойыншық» ретінде кәдеге жарады. Бұдан бөлек, қылқанжапырақты ағаштар мен бұтақтар харзаларға, атжалмандарға, кірпілерге, жайраларға жұмсақ төсеніш қызметін атқарды.

Экологиялық жобаға бірнеше гүл сататын дүкен мен 50-ден астам тұрғын үн қосқан. Хайуанаттар бағы ұжымы, тапсырылған ағаштардың ішінде тамыр жүйесі сақталған үш шырша барын, олардың бақ аумағына отырғызылғанын айтады.

«Акцияға белсенді қатысқан барлық қала тұрғынына, шараны кеңінен жариялаған БАҚ өкілдеріне шынайы алғыс білдіреміз. Көп мөлшерде қылқанжапырақты ағаш пен бұтақ жинадық. Жануарларға бұл қорек қана емес, сонымен бірге мекен ету ортасын жақсартуда маңызы зор: вольердегі әрбір жаңа зат – жаңа иіс, жаңа дәм және зерттеуге мүмкіндік», дейді Алматы хайуанаттар бағының ғылыми-әдістемелік бөлімінің басшысы Ақжами Еламанова.

«Шыршаны тапсыр» экологиялық акциясы табиғат пен жануарларға қамқорлық жасау әрбір адамға қолжетімді әрі қарапайым іс екенін тағы бір мәрте көрсетті. Алматы хайуанаттар бағы барлық қатысушыға белсенді азаматтық ұстанымы үшін алғыс білдіріп, алдағы уақытта да осындай бастамалар жалғаса беретінін жеткізді. Сонымен қатар мамандар қала тұрғындарын мереке аяқталғаннан кейін де қоршаған ортаға жауапкершілікпен қарап, экологиялық тұрғыдан тиімді шешімдер табуға шақырды.