Көбі ауыл балалары: әр өңірден жиналған оқушылар президенттік шыршаға қатысты

Qazaq24.com, Sputnik.KZ дереккөзінен алынған ақпаратқа сүйене отырып жаңалық таратты..

АСТАНА, 24 желтоқсан – Sputnik. Бүгін еліміздің әр өңірінен жиналған жүз бала президенттік шыршаға қатысты, деп хабарлады оқу-ағарту министрлігі.

Президенттік шырша "Жаңа жыл республика төрінде" деп аталды. Балаларға арналған мерекеге еліміздің барлық өңірінен жүз мектеп оқушысы қатысты. Президенттің балаларға арнаған сыйлықтарын оқушыларға оқу-ағарту министрі Жұлдыз Сүлейменова табыс етті.

Бүгін еліміздің әр өңірінен жиналған жүз бала президенттік шыршаға қатысты

Президент шыршасына 9-13 жас аралығындағы оқушылар қатысты. Биыл мемлекет басшысының ерекше құрметіне ие болған оқушылардың жартысынан көбі - ауыл балалары.

"Шараға қатысқан 30 бала көпбалалы отбасылардан шыққан. Балалардың үштен бірі асыраушысынан айрылған. Мерекелік кешті тамашалаған оқушылардың арасында әлеуметтік осал санатқа жататын және толық емес отбасылардың балалары да бар", - деп жазылған хабарламада.

Бүгін еліміздің әр өңірінен жиналған жүз бала президенттік шыршаға қатысты

Президент орталығында өткен салтанат кезінде балаларды жасанды интеллект көмегімен әзірленген Аяз ата мен Ақша қар қарсы алды, Теке, қошқар, Алладин мен Жасмин секілді ертегі кейіпкерлерімен жүздесті. Мерекелік кештің мазмұны балаларды батыл болуға, ашуды ақылға жеңдіруге, бірлік пен достықты бағалауға, өзгелерді құрметтеуге арналды.

"Осы залда отырған 100 баланың әрқайсысы білімде, спортта, шығармашылықта табысқа жеткен талантты өрендер. Біз сіздерге үлкен үміт артамыз. Болашақта білім алып, лайықты мамандық таңдап, елімізге адал қызмет етеді деп сенеміз",-деді балаларға президент сыйлығын табыс еткен Жұлдыз Сүлейменова.

Естеріңізге сала кетсек, Президент шыршасына қатысу үшін Елордаға келген балалар қаланы екі күн аралады.

Қосымша ақпарат пен соңғы жаңалықтар үшін Qazaq24.com сайтын бақылаңыз.