Хакімнен қалған қазына

Алматыдағы Ұлттық орталық музейде «Хакім Абай мұрасы» атты тақырыптық-экспозициялық көрме ашылды. Тағылымды шара ұлы ойшылдың туғанына 180 жыл толуына орай ұйымдастырылып отыр.

Суретті түсірген – Юрий Беккер

Көрмеде хакімнің әулеті, балалық шағы, қоршаған ор­­тасы мен өмірбаянын та­ныстыратын арнайы стенд­­тер, фотоматериалдар мен мұ­рағат құжаттары қойылған. Атап айтқанда, Абайдың ұлы Мағауияға 1896 жылы жазған хаты, ақынның өз қолы қойылған құжаттар, 1903 жылы берілген мінездеме, өмір деректеріне қатысты көшірмелер, кітаптар және ақын дәуірінің келбетін бей­не­лейтін жәдігерлер ерекше орын алады.

Көңіл аударған бірегей жә­ді­герлердің ішінде ақын­ның бәйбішесі Ділдәнің домбырасы, балдағы мен тоғызқұмалағы, інісі Ысқақ­тың бөрігі, кіші інісі Оспан­ның асырап алған қызы Ман­сураның камзолы, сондай-ақ ұрпағы Азат Әрхамұлы Ысқақов, Семейдегі Абайдың мемлекеттік қорық-музейі мен Ә.Жиреншин тараптарынан құрастырылған Абай әулеті мен туыстары жөніндегі шежірелер және бірнеше тың тарихи фотосурет – көрмедегі құнды материалдар.

Сол секілді Абай Құнан­байұлына қатысты қолжаз­балар, кітап басылымдары хакім мұрасына үңілгендер­ді бейжай қалдырмайды. Экс­позицияда ғалымдар тара­пынан Абайдың өз еңбегі деп танылған «Біраз сөз қазақ­тың түбі қайдан шық­қан­дығы туралы» атты бірегей туындысы, ақын шығар­малары жинақталған Мүр­сейіт Бікеұлының (1860–1917) қолжазбасы, Тұрағұл Абайұлының (1875–1934) «Қа­зақтың атақты ақыны Абай Құнанбайұлы» атты қол­жаз­басы, сондай-ақ Кәкітай мен Тұрағұл 1909 жылы Санкт-Петербургте бастырып­ шы­ғарған «Қазақ ақыны Ибраһим Құнанбай оғлының өлеңі» ­атты ерекше басылым көпшілік ­назарына ұсынылған.

Көрмені ашқан музей директорының міндетін атқарушы Сержан Саров, Әл-Фараби атындағы Қазақ ұлттық университеті жанын­дағы Абай ғылыми-зерттеу инс­титутының директоры Жан­ғара Дәдебайұлы, Қазақ ұлт­тық қыздар педагогикалық уни­верситетінің профессоры Руда Зайкенқызы, Фило­софия, саясаттану және дін­тану институтының бас ғы­лы­ми қызметкері Бақыт­жан Меңлі­бекұлы, Абай ғылыми-зерт­­теу институтының жетекші ғы­лы­ми қызметкері Ләйлә Мұ­салы, Иран Ислам Рес­публи­касы Бас консул­дығының мәдени ат­ташесі Хоссейн Ағазаде ақын мұрасының маңызын тілге тиек етті. Ғалымдар Абай шығар­­маларын оқу, білу, тану, жаң­ғыр­ту мен насихаттау тек қазақ хал­қының ғана емес, әлем ға­лым­­дарының борышы екеніне ерекше тоқталды.

АЛМАТЫ