Халық әртісі Секен Тұрысбеков Әміре Қашаубаев атындағы филармонияның директоры болып тағайындалды

Абай облысының мәдениет, тілдерді дамыту және архив ісі басқармасы басшысының 2026 жылғы 20 қаңтардағы №10 бұйрығына сәйкес Әміре Қашаубаев атындағы мемлекеттік филармонияның директоры қызметіне Секен Тұрысбеков тағайындалды, – деп хабарлайды Aikyn.kz сайты.

Секен Кәрімұлы Тұрысбеков 1961 жылы Абай облысы Үржар ауданында дүниеге келген. Ол Семей қаласындағы М.Төлебаев атындағы музыка училищесін, кейін Құрманғазы атындағы консерваторияны профессор М. Әубәкіровтің класында тәмамдаған. Еңбек өтілі – 40 жыл.

Секен Тұрысбеков – «Жігер» фестивалінің, Мәскеуде өткен жастар мен студенттердің дүниежүзілік фестивалінің лауреаты, Қазақстан Ленин комсомолы сыйлығының иегері, Қазақстанның еңбек сіңірген әртісі, Құрмет және Парасат ордендерінің иегері, Абай атындағы Мемлекеттік сыйлықтың лауреаты, Қазақстанның Халық әртісі.

Өнер жолын «Сазген» ансамблінен бастаған ол кейін «Ақ жауын» ансамблі мен оркестрін құрып, ұжымды халықаралық деңгейге көтерді. Оркестр Жапония, Қытай, Моңғолия, Франция, Германия және өзге де елдерде гастрольдік сапармен өнер көрсетті.

Осы уақытқа дейін Секен Тұрысбеков Сүйінбай атындағы Алматы облыстық филармониясының «Ақ жауын» халық аспаптар оркестрінің көркемдік жетекшісі қызметін атқарып келді.