Халықаралық қатынас жүйесіндегі Қазақстан

Биыл номері бірінші борт 170 шақырымға жуық жол жүрді.

Президент өңірлерге және шет мемлекеттерге жасаған сапары барысында 252 сағатын ұшақта өткізді. Аймақтық әрі геосаяси жағдайды бағамдау мақсатында жер-жиһанның біраз мемлекетіне барды. Әлемдік күн тәртібін тамыршыдай тап басып әрі бел ортасында жүрмей белгілі бір нәтижеге жету де мүмкін емес. Мемлекет басшысының көмекшісі – баспасөз хатшысы Руслан Желдібай барыс-келіс жайын баян етті.

Әлемнен ажырап, алысқа бара алмайсың. Сыртқы саясаттан сырт айналмай, сыр суыртпақтау керек. Биыл Қазақстанның халықаралық қатынастар жүйесіндегі қадамы қарқынды. Мемлекет басшысы ел мүддесін көздеп, 23 рет көкке көтерілді. Ресей мен Өзбекстанға мемлекеттік, ал Қытай, Иордания, Түркия, Қырғызстан және Жапонияға ресми сапар жасады. 16 мәрте жұмыс сапарымен де барды. Қатарында Ресей мен Өзбекстанға қайта соғып, Түрікменстан, Біріккен Араб әмірліктері, Әзербайжан, Тәжікстан және Қырғызстанға ұшты. АҚШ-қа да ат басын 2 рет бұрды. Америкамен 17 млрд.тан аса долларға келісім жасалды. Энергетика, сирек металдар мен минералдар, көлік және цифрлық технология бағыттары қамтылған. 

Бауыржан Ысқақов, экономист:

- Шетелдік сапарлардан халық сындарлы шешім күтетіні ақиқат. Сондай халықаралық кездесулерде жалпы сомасы 70 млрд доллардан аса коммерциялық келісімдер жасалды. Президент үкімет басшылары, жоғары лауазымды тұлғалар, халықаралық құрылымдар жетекшілері мен іскерлік топ өкілдері және сарапшылармен 186 кездесу өткізді. Астана да халықаралық диалогтың белсенді алаңына айналды. 

Әлібек Тәжібаев, «Еуразиялық мониторинг» сараптамалық зерттеулер орталығының директоры:

- Қазақстан қауіпсіз инвестициялау бойынша ұзақ жылдан бері беделге ие ел екенін ескеру керек. Тәуелсіздіктің алғашқы күндерінен бастап Қазақстан инвестициялар үшін қолайлы инфрақұрылым мен заңды құқықтық ахуал қалыптастыруды мақсат етті. Біз үшін Қазақстанның инвестициялық тұрақтылық сатысына енуі өте маңызды. Біздің экономикалық, саяси және құқықтық жүйеміз сенімді болған сайын саяси өсім болады.

Биыл шет мемлекеттердің басшылары елімізге 30 рет түрлі cапармен келді. Алыс-жақын елдердің мемлекет және үкімет басшылары бар. Сондай-ақ Қасым-Жомарт Тоқаев өзге де президенттермен 43 мәрте телефон арқылы сөйлесті. 30 мемлекет елшілерінен сенім грамоталарын қабылдады. Қысқасы сыртқы саясаттың сауатты жүргізілуіне қарай елге қаржы құйылады, сенім күшейеді.

Нысаналы Ығыл