Халықтың қарызы көбейіп жатыр: сарапшылар басты себепті атады

Сарапшылар мұны халық табысының артуымен емес, инфляцияның күшеюі мен өмір сүру құнының қымбаттауымен байланыстырады, – деп хабарлайды Aikyn.kz сайты.

Соңғы жылдары банктер мен микроқаржы ұйымдары онлайн несие рәсімдеуді жеңілдетіп, қарыз алуды бұрынғыдан да қолжетімді етті. Нәтижесінде азаматтар несиені көбіне тұрмыстық техника, смартфон, автокөлік, емделу, оқу ақысы және күнделікті шығындарды жабуға пайдаланып жүр.

Экономистердің айтуынша, несиеге сұраныстың артуына инфляция, халық табысының баяу өсуі, бөліп төлеу қызметтерінің кеңеюі, онлайн несиелеудің дамуы және қаржылық сауаттылықтың төмендігі әсер еткен.

Мамандар тұтынушылық қарыздың шамадан тыс өсуі алаңдатарлық жағдай екенін айтады. Бірнеше банктен қатар несие алу немесе ескі қарызды жаңасымен жабу азаматтардың қаржылық тәуекелін арттырып, отбасы бюджетіне салмақ түсіреді.

Осыған байланысты мемлекет қарыз алушылардың төлем қабілетін бағалауды күшейтіп, проблемалық несиелерді қайта құрылымдау тетіктерін жетілдіруде. Сонымен қатар халықтың қаржылық сауаттылығын арттыруға бағытталған жобалар жүзеге асырылып жатыр.

Сарапшылардың пікірінше, цифрлық банкингтің дамуына байланысты тұтынушылық несие алдағы жылдары да өседі. Алайда бұл үрдіс халық табысының артуымен қатар жүрмесе, ұзақ мерзімде қаржылық және әлеуметтік тәуекелдерді күшейтуі мүмкін.