Халықтың микроқаржылық ұйымдарға қанша қарызы бар анықталды

2026 жылғы 1 ақпандағы жағдай бойынша микроқаржылық қызметті жүзеге асыратын ұйымдардың (МҚҚЖҰ) активтері 2025 жылдың төртінші тоқсанында 2,2%-ға өсіп, 3,5 трлн теңгеге жетті, – деп хабарлайды Aikyn.kz сайты.

Өсім негізінен ломбардтардың тұтынушылық микрокредиттер көлемінің артуы есебінен қалыптасты. 2025 жылы жалпы өсім 17,2%-ды құрады.

Активтердің құрылымында микроқаржы ұйымдарының үлесі – 1,7 трлн теңге (47,4%), кредиттік серіктестіктер – 1,3 трлн теңге (36%), ал ломбардтар – 0,6 трлн теңге (16,5%) болды.

МҚҚЖҰ-ның несие портфелі 2025 жылдың төртінші тоқсанында 1,5%-ға өсіп, 3,1 трлн теңгеге жетті. Оның ішінде 56,6%-ы бизнеске, 43,4%-ы халыққа берілген микрокредиттер.

Бизнеске берілген микрокредиттер көлемі екі микроқаржы ұйымының екінші деңгейлі банкке айналуына байланысты 2%-ға азайып, 1,8 трлн теңгені құрады. Ал халыққа берілген қарыздар ломбардтардағы тұтынушылық микрокредиттердің өсуі нәтижесінде 6,4%-ға артып, 1,3 трлн теңгеге жетті.

Сонымен қатар 90 күннен астам мерзімі өткен қарыздардың (NPL90+) үлесі 3,9%-ға дейін төмендеді. Жеке тұлғалар портфелінде бұл көрсеткіш 5% болды.

2025 жылдың төртінші тоқсанында МҚҚЖҰ міндеттемелері 5,4%-ға өсіп, 2,3 трлн теңгеге жетті. Оның 66,2%-ы немесе 1,5 трлн теңгесі – алынған қарыздар.

Ал ұйымдардың меншікті капиталы бөлінбеген таза пайданың азаюына байланысты 3%-ға төмендеп, 1,3 трлн теңгені құрады.