Халықтың мойнындағы микронесие қарызы 1,3 трлн теңгеге жетті

Қазақстанда микроқаржы ұйымдары көрсететін қызметтер бойынша халықтың қарызы өсіп, 2025 жылдың 1 қазанына қарай 1,3 трлн теңгеге жетті. Бұл туралы қаржылық реттеушінің 3-тоқсан қорытындысы негізінде белгілі болды, деп хабарлайды Arasha.kz.

2025 жылдың үшінші тоқсанында микроқаржы ұйымдарының жалпы активтері 1,7%-ға төмендеп, 3,5 трлн теңгені құрады. Оның ішінде:

микроқаржы ұйымдарының үлесі – 1,7 трлн теңге (47,8%); несие серіктестіктері – 1,3 трлн теңге (37%); ломбардтар – 526 млрд теңге (15,2%).

Активтердің азаюы көбіне микронесиелер портфелінің төмендеуімен байланысты.

Саланың жиынтық несие портфелі 3-тоқсанда 3,7%-ға төмендеп, 3 трлн теңгені құрады. Бұған бизнес субъектілеріне арналған микронесиелердің азаюы тікелей әсер еткен. Бизнеске берілген микронесиелер көлемі 7,7%-ға азайып, 1,8 трлн теңгеге түсті. Бұған "KMF" МҚҰ-ның екінші деңгейлі банкке айналуы да себеп. Бизнеске бағытталған несие үлесі жалпы портфельдің 58,4%-ын құрап отыр. Ал халыққа берілген микронесиелер керісінше, өсім көрсетті. Ломбардтар белсенділігінің артуы есебінен бұл көрсеткіш 2,3%-ға өсіп, 1,3 трлн теңгеге жеткен.

90 күннен астам мерзімі кешіккен қарыздар (NPL90+) деңгейі жалпы портфель бойынша 4,4% болды (жыл басында – 4,6%).

Халыққа берілген микронесиелер бойынша – 6,4% (жыл басында – 6%); Бизнес портфелі бойынша – 3,3% (жыл басында – 3,1%).

Сектордың міндеттемелері алынған қарыздардың азаюынан 5,7%-ға төмендеп, 2,2 трлн теңгені құрады. Қорландыру құрылымында ең үлкен үлесті – 66,8% немесе 1,4 трлн теңге құрайтын сырттан алынған қарыздар алып отыр. Меншікті капитал тоқсан ішінде 5,8%-ға өсіп, 1,3 млрд теңгеге жеткен.