Зейнетақы активтері 25,1 трлн теңгеге жетті

Елдің Ұлттық банкі зейнетақы активтерінің табыстылығын арттыру шараларын күшейтпек.
Бұл туралы Ұлттық банк төрағасы Тимур Сүлейменов мәлімдеді. Оның айтуынша, 2025 жылы зейнетақы активтерінің көлемі 12%-ға өсіп, 25,1 трлн теңгеге жеткен. Инвестициялық табыс 1,8 трлн теңгені құраған.

Биыл Ұлттық қор тәжірибесіне ұқсас тәсіл қолданылып, ұзақ мерзімді табыстылықты арттыру үшін акциялар мен баламалы қаржы құралдары сияқты жоғары кірісті активтердің үлесін көбейту жоспарланып отыр.

Сонымен қатар болашақта лайықты зейнетақы төлемдерін қамтамасыз ету мақсатында табысты алмастыру коэффициентін арттыру көзделуде. Бұл зейнетақы жинақтарын мерзімінен бұрын алуға қойылатын шекті талаптарды қатаңдатуды талап етуі мүмкін.

Ұлттық банк мәліметінше, аталған шаралар зейнетақы жүйесінің тұрақтылығын нығайтып, ұзақ мерзімді кірістілікті қамтамасыз етуге бағытталған.