Отбасы банкінің қарызы көбейіп, керісінше табысы азайып кеткен

Отбасы банкінің 2025 жылғы тоғыз айдағы қаржылық көрсеткіштері жарияланып, банк активтері өссе де, таза пайда азайғаны белгілі болды. Аудиттелмеген аралық есепке сәйкес, биылғы қаңтар–қыркүйек аралығында банк активтері 14% өсіп, 4,878 трлн теңгеге жеткен. Ал таза пайда 9,4% төмендеп, 86,051 млрд теңге болды, деп хабарлайды Arasha.kz.

Осы кезеңде банк активтерінің негізгі бөлігін құрайтын клиенттерге берілген несиелер мен аванстардың көлемі 9,5% өсіп, 3,701 трлн теңгеге дейін ұлғайған.

Банк міндеттемелері де артқан: 2025 жылдың тоғыз айында олар 15,4% өсіп, 4,121 трлн теңгеге жеткен. Клиенттер қаражаты 11,6% көбейіп, 2,978 трлн теңгеге дейін өсті.

Мемлекеттік субсидиялар көлемі 2025 жылдың тоғыз айында 257,689 млрд теңгені құрады. Салыстырсақ, 2024 жылдың қорытындысы бойынша бұл көрсеткіш 264,044 млрд теңге болған. Субсидиялардың басым бөлігі – 62% – "2-10-20 концепциясы" («Бақытты отбасы») бағдарламасы бойынша үкіметтен қарыз тарту арқылы алынған.

Бұдан бөлек, мемлекеттік қаржыландыру келесі бағыттар бойынша жүргізілген:

«5-10-20 концепциясы» («Шаңырақ») бағдарламасы бойынша бас компаниядан бағалы қағаздар шығару арқылы — 36,3%;

«2-10-20 концепциясы» аясында жергілікті атқарушы органдардан қарыз алу арқылы — 1,7%.

Банктің меншікті капиталы 2025 жылдың қаңтар–қыркүйек айларында 6,6% өсіп, 756,82 млрд теңгеге жеткен.

Ұлттық банктің мәліметінше, активтер көлемі бойынша Отбасы банк еліміздегі банктер арасында төртінші орында. Қаржы ұйымының жалғыз акционері — «Бәйтерек» ұлттық басқарушы холдингі.