ХХІ ғасыр көшбасшысы іріктеу кезеңінің жеңімпаздары анықталды

ХХІ ғасыр көшбасшысы» зияткерлер сайысының Ақтөбеде өткен облыстық іріктеу кезеңінде шалғай ауыл оқушылары жеңімпаз атанды. Байғанин, Темір және Шалқар мен Мәртөк ауданынан келген үздік бестік республикалық додаға жолдама алды. Олар көрерменнің сүйікті тележобасына айналған бағдарламада бақ сынайтын болады. 

Бағдарламаға іріктеу кезеңінен мүдірмей өткен Жаңылсын Русланқызы Темір ауданы, Шұбарқұдық орта мектебінің шәкірті. Үздік бестік қатарынан табыларына сенімі мол болған. Түрлі білім додасына қатысып жүрген жас талант жеңіске жетелейтін жоспарды алдын ала құрып, үнемі дайындалып жүретінін айтты. 

Жаңылсын Русланқызы, облыстық кезең жеңімпазы:

- Ең біріншісі – жоспар. Себебі жоспарсыз біз өз уақытымызды жақсы бөле алмаймыз. Екіншіден – тәртіп. Себебі тәртіп болмаса, білім ешқандай сізге пайдасын әкелмейді. Үшіншіден – ол сіздің қалауыңыз. Яғни сіз қаламай ештеңеге жете алмайсыз. Яғни тәртіпсіз жоспардың өзі көмектеспейді. 

Байғанин ауданынан келген Ұлықбек Нұрадинов «XXI ғасыр көшбасшысы» бағдарламасының тұрақты көрермені. Хабар агенттігінің интернеттегі мұрағатын ақтарып, ескі шығарылымдарын да қарап жүреді. Сүйікті жобаға қатысуға мүмкіндік туғанына дән риза. 

Ұлықбек Нұрадинов, облыстық кезең жеңімпазы:

- Жеңімпаз атанғаныма қуаныштымын. Маған бұл сайыс ұнады. Бұйырса республикада өзімді көрсетемін деген ойдамын. Сайысқа қатысудағы мақсатым ол біріншісі грант ұту. Екінші ол өзімнің және ата-анамның үмітін ақтау. 

Оқу грантына үміткерлердің бірі Әділ Ұзақбай Шалқар ауданының тумасы. Бір ғасырдан астам тарихы бар мектептің шәкірті. Іргелі оқу ордасының үлгілі түлегі атанып, болашақта білім беру саласына үлес қосуды армандайды. 

Әділ Ұзақбай, облыстық кезең жеңімпазы:

- Грант жеңіп алып, ата-анамның үмітін ақтап, мұғалім болып, өзімнің мектебіме мұғалім болып келіп жаңадан өсіп келе жатқан жас буындарды тәрбиелеп, дұрыс жолға түсіріп, оларға сабақ үйретіп осындай олимпиада жүлдегерлері болғанын қалаймын.

Биыл облыстық кезеңде оза шапқан оқушылардың барлығы да ауыл мектептерінен. Мұның өзі білім деңгейінің қаладан кем түспейтінін көрсетеді. Мәртөк ауданындағы Сарыжар орта мектебінің екі бірдей оқушысы республикалық додаға жолдама алды. Бір сыныпта білім алатын құрбылар Ақниет Мұхамбедин мен Аяжан Мұхамбетова үздік атанды. Түрлі білім олимпиадалардың жүлдегері Аяжан Мұхамбетова спорттық жарыстардан да қол үзбейді. Болашақта денсаулық сақтау саласында еңбек етуді мақсат тұтқан. Мектепті тәмәмдаған соң еліміздегі ірі медициналық оқу орнындарының біріне түсуді армандайды.

Аяжан Мұхамбетова, облыстық кезең жеңімпазы:

- Денсаулық ең бастысы. Мысалы әртүрлі жүрек аурулары немесе емделмейтін ауруларды емдеуге әртүрлі технологиялардың шығарылауы, тағы да жобалар шығарылуы мен үшін өте маңызды және керек деп ойлаймын біздің елге.

Ақниет Мұхамбедин де жалпы білім, логика, музыка, өнер, спорт сияқты түрлі саланы қамтыған тест сұрақтарынан сүрінбей өткен. Өскелең ұрпақтың ойлау қабілетін шыңдайтын бірегей жобада еліміздің озат оқушыларымен сынға түсу мен үшін мәртебе дейді. Көшбасшылық қасиетті де ұштайтын бағдарламаның берері мол дейді. 

Ақниет Мұхамбедин, облыстық кезең жеңімпазы:

- Көшбасшы болудың ең бірінші қағидаты ол – икемді болу. әрбір салады. Сала таңдамай, бағыт таңдамай қандай сала бар, сенің қоршаған ортаң не қамтиды соның барлығына жетік икемділік және оны танып білу қасиеті керек деп ойлаймын. Одан кейін сенімділік. Өзіңде сенімділік болса сенің жаныңдағы адамдардың өзіңе қадірлі болуыңа және өзіңе сенімді екенін көрсете аласың деп білемін. 

Оқу-ағарту министрлігі мен «Хабар» арнасы ұйымдастырған «ХХІ-ғасыр көшбасшысы» зияткерлік ойынының түсірілімі көктемде басталады. Әзірге облыстық кезеңнен оқ бойы озып шыққан оқушылар дайындыққа кірісіп кеткен. 

Авторлары: Мансұр Есқожин, Айнадин Молдабеков, Айбек Даутов