Хиджабқа рұқсат берген жекеменшік мектеп лицензиясынан айырылуы мүмкін министр

Қазақстанда оқушыларға хиджаб киюге рұқсат берген жекеменшік мектептерге қатысты шара қолданылуы мүмкін, – деп хабарлайды Aikyn.kz сайты.

Министрдің айтуынша, мектеп формасына қойылатын талаптар мемлекеттік қана емес, жекеменшік білім беру ұйымдарына да ортақ. Сондықтан жекеменшік мектептер де оқушылардың киіміне қатысты белгіленген талаптарды сақтауға міндетті.

Жұлдыз Сүлейменова өткен оқу жылында кейбір жекеменшік мектептерде оқушылардың хиджаб киюіне рұқсат берілген жағдайлар болғанын айтты. Ал биылғы оқу жылы басталғалы мұндай деректер тіркелмеген.

– Лицензиялау мәселесі бар. Яғни лицензиясын қайтарып алу мүмкіндігі қарастырылады, – деді министр.

Оның сөзінше, бұл мәселе бойынша Оқу-ағарту министрлігімен қатар Ұлттық қауіпсіздік комитеті, әкімдіктер және жергілікті атқарушы органдардың өкілдері қатысатын комиссия жұмыс істейді.

Қолданыстағы талап бойынша мектеп формасына діни конфессияларға қатысты киім элементтерін қосуға болмайды. Бұл талап мемлекеттік және жекеменшік мектептердің барлығына қолданылады.

Айта кетейік, Қазақстанда мектепте хиджаб кию мәселесі бұған дейін де бірнеше рет қоғамдық талқылауға түскен. Қолданыстағы мектеп формасына қойылатын талаптарда діни киім элементтеріне қатысты шектеу сақталып отыр.