ХҚКО: Қазақстанда бейнеқоңырау арқылы 72 мыңнан астам өтініш қабылданды

«Азаматтарға арналған үкімет» мемлекеттік корпорациясы» КЕАҚ БҚО филиалынан мәлім еткеніндей, 2025 жылы бұл сервис арқылы Қазақстанда 72 мыңнан астам өтініш қабылданған.
Бейнебайланыс нақты уақыт режимінде жұмыс істейді: оператор бейнеқоңырау арқылы кеңес береді, құжаттарды толтыруға көмектеседі және өтінішті онлайн қабылдайды.
Бір бейнеқоңыраудың орташа ұзақтығы — 5–15 минут, бұл көптеген мәселені жедел шешуге мүмкіндік береді.

Бейнеқоңырау арқылы 79 мемлекеттік қызмет көрсетіледі. Олардың қатарында соттылығы туралы анықтама алу, тұрғылықты жері бойынша тіркелу, әлеуметтік төлемдерді рәсімдеу және көпбалалы отбасыларға жәрдемақы тағайындау сияқты қызметтер бар.

Қызметті пайдалану үшін «ЦОН» мобильді қосымшасын ашып, «ХҚКО қызметтері» бөліміне өтіп, «Бейне қызметі» бөлімшесін таңдап, «Бейне қоңырауға өту» батырмасын басу қажет. Оператор кеңес беріп, өтінішті рәсімдейді, ал нәтижесін қосымшадағы чат арқылы немесе дайын құжатты ХҚКО бөлімшесінен алуға болады.

— Бейнеқызмет шалғай елді мекендердің тұрғындарына және ерекше қажеттіліктері бар азаматтар үшін мемлекеттік қызметтерді қолжетімді етуге мүмкіндік береді. Сонымен қатар сервис мемлекеттік қызметтердің цифрлық трансформациясының бір бөлігі болып есептеледі. Цифрландыру және жасанды интеллект жылы аясында басты назар азаматтарға ыңғайлы әрі сапалы қызмет ұсынуға бағытталған, — деп хабарлады ведомстводан.

Еске сала кетейік, бұдан бұрын жылжымайтын мүліктің бірыңғай мемлекеттік кадастры бойынша 100 млн өтінім түскенін жазған болатынбыз.