ІІМ ауқымды операциясы 28 мың қауіпті дәрі дәрмектің айналымы шектелді

Қазақстанда "Дәрмек" жедел-профилактикалық іс-шарасы аясында 1500-ден астам медициналық мекеме мен дәріхана тексерілді. Нәтижесінде 249 құқық бұзушылық анықталып, 28 мың қауіпті дәрілік заттың айналымына шектеу қойылды, деп хабарлайды Tengrinews.kz Polisia.kz сайтына сілтеме жасап.

Мыңдаған дәріхана мен медициналық мекеме тексерілді

Операцияның кезекті кезеңі 21-25 қыркүйек аралығында өтті. ІІМ қызметкерлері денсаулық сақтау органдарымен бірлесіп, құрамында психотроптық және күшті әсер ететін заттары бар дәрілік заттардың айналымы ережелерінің сақталуын тексерді.

Мұндай препараттарды рецептсіз сату, оның ішінде кәмелетке толмағандарға өткізу фактілеріне ерекше назар аударылған.

Дәріханалар мен медициналық мекемелерден бөлек, 142 өнеркәсіптік кәсіпорын тексерілді. 249 әкімшілік құқық бұзушылық анықталды. Құрамында есірткі бар 28 мың дәрілік заттың айналымы шектелді.

Жаттықтырушыдан 56 таблетка табылды

Операция барысында ІІМ қызметкерлері күшті әсер ететін заттардың заңсыз айналымына қатысты бірнеше деректі анықтады.

Петропавлда жүзуден жаттықтырушы ұсталып, одан 56 дана күшті әсер ететін заттар таблеткасы тәркіленді.

Түркістандағы дәріханалардың бірінде мұндай препараттарды лицензиясыз сату фактісі тіркелді. Ол жерден 5 мыңнан астам таблетка алынды.

Оралда лицензиялау талаптарын бұзғаны үшін 500 тонна тұз қышқылының айналымына шектеу қойылды.

675 тонна прекурсордың айналымы шектелді

ІІМ химиялық заттар мен прекурсорлардың заңды айналымнан заңсыз айналымға өтпеуін бөлек тексерді.

Нәтижесінде 675 тонна түрлі прекурсорлардың айналымы шектеліп, 90 заңды тұлға әкімшілік жауапкершілікке тартылды.

Күшті әсер ететін заттармен заңсыз операциялар жасағаны үшін 15 жылға дейін бас бостандығынан айыру жазасы қарастырылған

ІІМ 2026 жылдың 1 қаңтарынан бастап Қазақстанда күшті әсер ететін заттарды заңсыз иемденгені, сақтағаны және тасымалдағаны үшін қылмыстық жауапкершілік енгізілгенін ескертті. Мұндай бұзушылықтар үшін бес жылдан 15 жылға дейінгі мерзімге бас бостандығынан айыру жазасы қарастырылған.

Бізді Google-дың негізгі дереккөздер тізіміне қосыңыз

Қосу