ІІМ госпиталінде полиция қызметкерлеріне арналған оңалту орталығы ашылды

Полиция қызметі әрдайым қауіп-қатермен байланысты. Тәуелсіздік жылдары ішінде қызметтік борышын өтеу кезінде бес мыңға жуық қызметкер түрлі жарақат алған. Бұл жай ғана статистика емес — әрбір санның артында азаматтарды қорғап жүріп, өздері де қолдау мен оңалтуды қажет ететін адамдардың тағдыры тұр.

Ішкі істер министрінің тапсырмасы бойынша госпитальда қызметкерлерді кешенді оңалтудан өткізуге барлық жағдай жасалған. Мұнда олар қалпына келтіру емін алып, толыққанды өмірге және қызметке қайта оралуға мүмкіндік алады.

Алғашқы қабылдау 20 сәуірде өтті — орталыққа еліміздің әр өңірінен 12 қызметкер жіберілді. Оңалту негізгі медициналық бағыттар бойынша жүргізіледі: травматология, неврология, кардиология және терапия.

Пациенттерге заманауи емдеу процедураларының кең ауқымы қолжетімді: емдік дене шынықтыру, массаж, механотерапия, гидрокинезотерапия, бальнеотерапия, лазерлік терапия және өзге де қалпына келтіру әдістері.

Орталықтың жұмысы тұрақты негізде ұйымдастырылады — қабылдауларды тоқсан сайын өткізу жоспарланып отыр.

Орталықтың ашылуы — жеке құрамды қолдау жүйесіндегі нақты қадам. Ішкі істер министрлігі ел қауіпсіздігі үшін күнделікті жауапкершілік жүктелген қызметкерлерді қолдау деңгейін арттырып отыр.

Айта кетелік Алматыда ІІМ-нің жаңа академиясының құрылысы басталған еді.