Атырауда Алмалы оңалту орталығы ашылды

Атырауда мүмкіндігі шектеулі жандарға арналған жаңа «Алмалы» оңалту орталығының ашылу рәсімі өтті. Бұл әлеуметтік маңызы зор нысан Мемлекет басшысының Ұлттық құрылтайдың IV отырысында берген тапсырмасы негізінде іске қосылды.

Салтанатты шараға облыс әкімі Серік Шәпкенов, мемлекеттік органдар өкілдері, ардагерлер мен қала тұрғындары қатысты.

Жалпы аумағы 22 мың шаршы метрді құрайтын үш қабатты орталықтың құрылысы 2023 жылы басталған. Бір мезетте 150 адамды қабылдай алатын мекеме балалар мен ересектерге кешенді оңалту қызметін көрсетеді. Бұған дейін жылына шамамен 1100 адамға көмек көрсетілсе, енді бұл көрсеткіш 2300-ге дейін артады.

Облыс әкімі өз сөзінде әлеуметтік инфрақұрылымды дамыту мен ерекше қажеттілігі бар азаматтарды қолдау мемлекеттік саясаттың басым бағыты екенін атап өтті. – Бұл орталық мүмкіндігі шектеулі азаматтарға жан-жақты қолдау көрсетеді. Әр адамға тең мүмкіндік беретін инклюзивті қоғам қалыптастыру жолындағы маңызды қадам, – деді ол.

Орталықта тірек-қимыл аппараты бұзылған, балалар церебралды сал ауруына шалдыққан, Даун синдромы мен аутизм спектріндегі ауытқулары бар 3–18 жас аралығындағы балаларға кешенді оңалту қызметі ұсынылады. Мұнда АВА-терапия кабинеттері, механотерапия залдары, сенсорлық бөлмелер, еңбек және арт-терапия шеберханалары бар.

Ересектерге де қолайлы жағдай жасалған: физиотерапия кабинеттері, заманауи құрылғылармен жабдықталған емдік дене шынықтыру залы, бассейн және су емдеу кешені жұмыс істейді.

Орталық директоры Анар Қаюпованың айтуынша, қызмет алты бағыт бойынша ұйымдастырылған: әлеуметтік-тұрмыстық, медициналық, психологиялық, педагогикалық, әлеуметтік-еңбек және мәдени оңалту. Әрбір адамға жеке бағдарлама жасалып, 189 маман қызмет көрсетеді.

Қазіргі таңда Атырау облысында 27 мыңнан астам мүмкіндігі шектеулі азамат тұрады. «Алмалы» орталығының ашылуы – әлеуметтік саладағы елеулі жаңалық әрі ерекше қажеттілігі бар жандарға қолайлы орта құрудағы маңызды қадам.

Бүгін, 16:32