Алматыдағы РФММ нің 50 ге жуық оқушысы ауруханаға түсті

Алматыда Республикалық физика-математика мектебінің (РФММ) 50-ге жуық оқушысы жіті ішек инфекциясы белгілерімен ауруханаға жатқызылды. Бұл ақпаратты Балалар қалалық клиникалық жұқпалы аурулар ауруханасы растады, деп хабарлайды Tengrinews.kz.

Бұған дейін әлеуметтік желілерде жазба жарияланды, онда желі қолданушыларының бірі ауруханаға жиендері мен басқа да оқушылардың түскенін хабарлаған.

"Улану дейді! Кейбірінен ішек таяқшасы табылған! Бүгін бүкіл мектептің үш күнге карантинге жіберілгенін айтты. Неге еш жерде жарияланбайды?! 50-ге жуық оқушы ауруханаға түсті!" - деп жазды ол.

Жазба астындағы пікірлерде Балалар қалалық клиникалық жұқпалы аурулар ауруханасы 12-13 қазан күндері жіті ішек инфекциясы белгілерімен 47 оқушының ауруханаға жатқызылғанын мәлімдеді. Қазір олардың барлығы дәрігерлердің бақылауында.

Интернаттағы тағы сегіз бала оқшауланып, медициналық бақылауға алынды.

Санитариялық-эпидемиологиялық бақылау департаментінің қаулысымен мектеп жұмысы уақытша тоқтатылғаны хабарланды. Мамандар тексеріс жүргізіп, зертханалық зерттеулер үшін сынамалар алды.

Бізді Google-дың негізгі дереккөздер тізіміне қосыңыз