ІІМ рақымшылықпен қанша адамның босатылғанын хабарлады

590 мыңға жуық қазақстандық әкімшілік рақымшылыққа ілікті. 

Oларға қатысты жалпы сомасы 22 миллиард теңгеден астам болатын 1,3 миллиондай әкімшілік жаза тоқтатылды, деп хабарлады Ішкі істер министрлігі.

«Бүгінгі таңда соттарға 10 мыңнан астам ұсыныс жіберілді. Оның 4400-ге жуығын қылмыстық-атқару жүйесі мекемелері, ал 6900-ден астамын пробация қызметтері дайындады», — деп атап өтті ІІМ Қылмыстық-атқару жүйесі комитеті төрағасының бірінші орынбасары Нияз Рыспаев.

Соттар мыңнан астам материалды қарады. Нәтижесінде қылмыстық-атқару жүйесі мекемелерінен 620 адам босатылып, оларға босатылғаннан кейін әкімшілік қадағалау белгіленді. Пробация қызметінде есепте тұрған тағы 724 азамат жазасын әрі қарай өтеуден босатылды. Мұнымен қоса, 730-дан астам сотталғанның жаза мерзімдері қысқартылды.

Қазақстанның жаңа Конституциясын қабылдауға орайластырылған рақымшылық туралы заңға Мемлекет басшысы 1 шілдеде қол қойған болатын.

ІІМ бұл әкімшілік рақымшылықтың Тәуелсіз Қазақстан тарихында алғаш рет өткізіліп отырғанын атап өтті. Ол азаматтарды заңда көзделген құқық бұзушылықтар үшін айыппұл төлеуден босатады.

Дегенмен, бұл рақымшылық біржолғы шара болып табылады және болашақта жасалатын құқық бұзушылықтарға қолданылмайды. Заңды қайта бұзған жағдайда азаматтар жалпы негізде жауапкершілікке тартылады.

«Рақымшылық — біржолғы ізгілік шарасы және ол болашақтағы құқық бұзушылықтар үшін жауапкершіліктен босатпайды», — деп баса айтты ІІМ Әкімшілік полиция комитетінің төрағасы Мұрат Қабденов.

Бүгін, 15:55