iPhone сатып алынды : алаяқтықтың жаңа түрі пайда болды

АЛМАТЫ, 13 мамыр – Sputnik. Бас прокуратураның Құқықтық статистика және арнайы есепке алу комитеті алаяқтықтың жаңа схемасы пайда болғанын ескертті, деп хабарлайды Sputnik Қазақстан.

"Шетелдік дереккөздердің мәліметінше, алаяқтар iPhone сатып алынғаны туралы жалған хабарламалар таратып жатыр", – делінген Бас прокуратураның хабарламасында.

Алаяқтар Apple мекенжайы ретінде көрсетілген жалған хаттарды пайдаланып, хабарламаның мазмұнын өзгертіп, оны шынайы етіп көрсетеді.

"Хатта пайдаланушыға iPhone сатып алынғаны туралы хабар беріліп, транзакцияны болдырмау ұсынылады. Ол үшін көрсетілген телефон нөміріне "қолдау қызметіне" хабарласу қажет екені айтылады", – дейді ведомство.

Қоңырау барысында алаяқтар Apple ID бұзылды деп сендіріп, аккаунтты "қорғау" үшін:

құрылғыға қашықтан қол жеткізуге арналған бағдарламаны орнатуды;

құпия деректерді, соның ішінде парольдерді беруді;

психологиялық қысым арқылы шұғыл әрекет етуді талап етеді.

Бас прокуратура мынадай сақтық шараларын ескертеді:

күмәнді сілтемелерге өтпеу және белгісіз нөмірлерге қоңырау шалмау;

сатып алу туралы ақпаратты тек ресми сервистер арқылы тексеру;

бөгде бағдарламаларды орнатпау;

екі факторлы аутентификацияны қосу.

Осындай хабарлама алған жағдайда ресми қолдау қызметіне жүгініп, құқық қорғау органдарына хабарлау қажет.