Иран АҚШ пен Израильдің банктері мен экономикалық нысандарына соққы жасауы мүмкін

Иранның «Хатам Әл Анбия» біріккен командалық штабының өкілі Ибрахим Зольфакари сәрсенбі күні Тегеран АҚШ пен Израильге байланысты экономикалық орталықтар мен банк құрылымдарына соққы беруі мүмкін екенін мәлімдеді. Бұл туралы Иранның ресми БАҚ-тары хабарлады.

Оның айтуынша, мұндай шешім Иран банктерінің біріне жасалған шабуылдан кейін қарастырылып отыр, оны ирандық тарап АҚШ пен Израильдің әрекеттерімен байланыстырады.

Spokesman for the Khatam al-Anbiya Central Headquarters: Last night, the terrorist American army and the brutal Zionist regime, after failing to achieve military objectives, targeted one of the country's banks.

— IRNA News Agency ☫ (@IrnaEnglish) March 11, 2026

— Өз науқанын сәтсіз аяқтаған АҚШ армиясы мен қатал сионистік режим еліміздің бір банкін нысанаға алды. Бұл заңсыз әрі бұрын соңды болмаған әрекет арқылы дұшпан бізді аймақтағы АҚШ пен сионистік режимге қатысты экономикалық орталықтар мен банктерге соққы беруге мәжбүр етуде, — деді штаб өкілі.

Сонымен қатар, ол аймақтағы тұрғындарды банктер мен ұқсас нысандардан алыс болуға шақырды.

Өз кезегінде Иран Ислам революциясы сақшылары корпусына байланысты Tasnim агенттігі Израильмен байланысы бар және әскери мақсатта қолданылған технологиясы бар АҚШ компанияларының кеңселері мен инфрақұрылым объектілерінің тізімін жариялап, оларды «Иранның жаңа нысандары» деп атады.

— Аймақтық соғыс инфрақұрылымға дейін кеңейген сайын, Иран үшін заңды нысандардың шеңбері де ұлғаяды, — делінген мәлімдемеде.

Тізімге Google, Microsoft, Palantir, IBM, Nvidia және Oracle компанияларына байланысты нысандар кірді, олар Израильдің бірнеше қаласында және Парсы шығанағы елдерінде орналасқан.

Бұған дейін Иран 1 300 бейбіт тұрғынның қаза тапқанын және мыңдаған нысанның жойылғанын хабарлаған болатын.