АҚШ пен Иран бір бірінің нысандарына соққы бере бастады

АҚШ Қарулы күштерінің Орталық қолбасшылығы (CENTCOM) Иран Ислам революциясы сақшылар корпусы Ормуз бұғазын бұғаттағаннан кейін Иран нысандарына соққы жасағанын мәлімдеді. Бұл туралы CENTCOM-ның X әлеуметтік желісіндегі жазбасында айтылды, - деп хабарлайды Tengrinews.kz.

"Бұған жауап ретінде АҚШ Иранды ауыр зардап шегуге мәжбүр етіп отыр. Біз бұғаз арқылы еркін өтетін азаматтық теңізшілер мен коммерциялық кемелерге шабуыл жасау мүмкіндігін әлсіретуді жалғастырамыз. Соққылар жоғарғы бас қолбасшының тапсырмасымен жасалып жатыр", — деп мәлімдеді CENTCOM.

Бүгін Шығыс уақытымен сағат 19:15-те АҚШ Орталық қолбасшылығының күштері Ислам революциясы күзеті корпусының Ормуз бұғазы арқылы өтіп бара жатқан Кипр туы астындағы M/V GFS Galaxy контейнер тасушы кемесіне ашықтан-ашық шабуылынан кейін Иранға осы аптадағы үшінші соққылар сериясын бастады. Азаматтық экипаж…

— АҚШ Орталық қолбасшылығы (@CENTCOM) 11 шілде, 2026 жыл

IRIB мемлекеттік телерадиокомпаниясының ақпаратынша, Иранның оңтүстігіндегі Ассалуйе, Конарек, Бендер-Аббас, Сирик және Чахбехар қалаларында, сондай-ақ, Кешм аралында жарылыстар болды.

Axios тілшісі Барак Равидтің мәліметінше, АҚШ Иранның радарларына, зымыран және дрон қоймаларына, сондай-ақ, ұшыру қондырғыларына соққы жасап жатыр.

"Америкалық шенеунік соққы нысандарының арасында әуе бақылау радиолокациялық станциялары, зымырандар мен ұшқышсыз ұшу аппараттарының қоймалары, оларды ұшыру алаңдары, су бетіндегі жағдайды бақылау радиолокациялық станциялары және зениттік зымыран кешендері бар екенін айтты", — деп жазды журналист X әлеуметтік желісінде.