Иран ядролық келісімге келу үшін тиімді ұсыныстарды талқылауға дайын дипломат

Бұл туралы BBC хабарлады.

Америкалық ресми тұлғалар бұған дейін бірнеше рет келіссөздердің созылып кетуіне АҚШ емес, Иран кінәлі екенін айтып келген.

Сенбі күні АҚШ Мемлекеттік хатшысы Марко Рубио президент Дональд Трамп келісім жасасуды құптайтынын, алайда Иранмен бұл «өте қиын» екенін атап өтті.

Дегенмен, Тахт-Раванчи BBC-ге берген сұхбатында ендігі қадамы АҚШ жасау керектігін айтып, Вашингтонның шынымен келісімге келгісі келетінін дәлелдеуі қажет екенін жеткізді.

- Егер олар шынайы болса, келісімге апарар жолдамыз деп сенемін, — деді ол.

Трамп бұған дейін Иранның ядролық бағдарламасын шектеу жөнінде мәмілеге қол жеткізілмесе, соққы жасайтынын мәлімдеген. Осы тұста АҚШ аймаққа әскерін топтастырып жатқан.

Бұл мәлімдемелер Иранда қаңтар айында өткен жалпыұлттық үкіметке қарсы наразылық шерулерінің күшпен басып-жаншылуынан кейін айтылды. Құқық қорғау ұйымдарының дерегіне сәйкес, сол оқиғалар кезінде мыңдаған адам қаза тапқан.

Ақпан айының басында АҚШ пен Иран Оманда жанама келіссөздер өткізді.

Тахт-Раванчидің айтуынша, бұл диалог жалпы алғанда оң бағытта жүріп жатыр, бірақ нақты баға беруге әлі ерте. Ол келіссөздердің екінші раунды сейсенбі күні Женевада өтетінін растады. Трамп та бұл кездесулерді позитивті деп сипаттаған.

Ирандық дипломат Тегеранның уранды 60 пайызға дейін байыту жөніндегі ұсынысын келісімге әзірліктің дәлелі ретінде еске салды. Қаруға жақын деңгейдегі байыту Ислам Республикасы ядролық қару жасауға бет алды деген күдікті күшейткен. Алайда Иран бұл айыптауларды үнемі жоққа шығарып келеді.

-Егер олар санкциялар алынатын болса, біз бағдарламамызға қатысты өзге де мәселелерді талқылауға әзірміз», — деді Тахт-Раванчи.

Ол санкциялардың барлығын алып тастауды көздеп отыр ма, жоқ оның белгілі бір бөлігін алып тастау туралы сөз қозғады ма, ол жағын нақтыламады.

Иранның 2015 жылғы ядролық келісімде көзделгендей, ел аумағындағы 400 килограмнан асатын жоғары байытылған уран қорын сыртқа шығару мәселесіне келсек, дипломат: «Келіссөздер барысында не болатынын айтуға әзірге ерте», — деп жауап берді.

Бұған дейін БАҚ-та Тегеранның уран байытуды уақытша тоқтату жөніндегі өзге де ұсыныстары болғаны хабарланған.

Осыған дейін Иран санкциялар толық алынған жағдайда уранды байыту деңгейін төмендететіні туралы айтылған болатын.