Иранға тиесілі емес алғашқы танкер Ормуз бұғазы арқылы өтті

Anadolu Ajansı агенттігінің хабарлауынша, АҚШ пен Израильдің Иранға бірлескен шабуылдарынан кейін Иран Ормуз бұғазын жауып, әсіресе осы елдермен байланысты кемелерге өтуге тыйым салған. Содан кейін бұғаздағы көлік қозғалысы іс жүзінде тоқтап қалған еді. 28 ақпаннан бастап Ормуз бұғазы арқылы өтетін кемелердің көпшілігі Иран туы бар кемелер болатын.

MarineTraffic нақты уақыт режиміндегі бақылау платформасының деректеріне сәйкес, Таяу Шығыстағы шиеленістің үшінші аптасында Абу-Дабиден Das шикі мұнайын тасымалдайтын Aframax «Karachi» танкері автоматты сәйкестендіру жүйесі (AIS) іске қосылған, Ормуз бұғазы арқылы өткен алғашқы ирандық емес кеме болды.

— Ұзындығы 237 метр болатын мұнай цистернасы 15 наурызда Түркия уақыты бойынша сағат 14:33-те Иранның ерекше экономикалық аймағына кіріп, Ормуз бұғазы арқылы сағат 17:43 шамасында өтті. AIS жүйесі қосылған бұғаздан өткен Пәкістан туы бар танкер қазіргі уақытта Оман шығанағында жүріп жатыр, - деп жазады Anadolu Ajansı агенттігі.

MarineTraffic мәліметі бойынша, бұл кейбір жүктерге қауіпсіз өтуге рұқсат берілгенін көрсетеді.

Әлемдік мұнай тұтыну көлемінің 20%-ы (күніне шамамен 20 миллион баррель) өтетін Ормуз бұғазы мұнай жеткізу тұрғысынан стратегиялық маңызға ие екендігі аталып өтті. Бірақ бұл бұғаздағы қозғалыс іс жүзінде тоқтап қалған болатын.

Kazinform үшін арнайы Anadolu Ajansı серіктес агенттігі ұсынған.

Айта кетейік, Ирак Ормуз бұғазы жабылғаннан кейін ең ірі мұнай кен орындарының жұмысын тоқтатты.

АҚШ президенті Дональд Трамптың әкімшілігі бір апта ішінде Иранның жағалауымен өтетін Ормуз бұғазы арқылы кемелерді алып жүру үшін халықаралық коалиция құруды жоспарлап отыр.