Ішкі саясаттың тұжырымдамасы бекітілді

Еліміз бірлік, әділдік және жауапкершілікке негізделген жаңа идеологиялық жүйеге қадам басты. Біртұтас құжат әзірлеу идеясы алғаш Бурабайда өткен ұлттық құрылтайда көтерілген еді. Сол кезде Мемлекет басшысы қоғамды біріктіріп, елдің дамуына бағыт-бағдар беретін бірыңғай бағдарларма әзірлеуді ұсынды.

Енді жастар саясатынан бастап ұлттық мәселеге дейінгі барлық жұмыс біртұтас жүйе аясында атқарылады. Сарапшылардың пікірінше, ішкі саясат тұжырымдамасының қабылдануы - соңғы жылдары елде жүргізіліп жатқан реформалардың заңды жалғасы.

Әділ Сейфуллин, саясаттанушы:

-  Бұл – ондаған жылдарға арналған ауқымды тұжырымдама. Яғни ол үшін жауап беретін нақты бір мемлекеттік орган болмайды. Себебі барлық тарап атсалысады. Ішкі саясат тұжырымдамасы Президенттің 2019 жылы жариялаған «Еститін мемлекет» жобасын, «Адал азамат», «Таза Қазақстан», сондай-ақ «Күшті президент – ықпалды парламент – есеп беретін үкімет» тұжырымдамасын біріктіреді. Осы жылдар ішінде көптеген жоба қолға алынды, енді олардың барлығы біртұтас тұжырымдамаға біріктірілді. Меніңше, бұл жалпы саяси логикаға сай келеді.