Испания мен Португалияда нөсер жауыннан төтенше жағдай жарияланды

Испанияның оңтүстігі мен Португалияның орталық және оңтүстік аймақтарын қамтыған қатты жауын-шашын жаппай эвакуацияға, көлік қозғалысының тоқтауына және инфрақұрылымға елеулі зиян келтірді, деп хабарлайды АА.

Испанияда:

Андалусия автономиялық қауымдастығында 7 500 адам үйлерінен көшірілді. Кадис провинциясындағы Грасалема қаласы толық эвакуацияланды. 140 автожол жабылды, оқу орындары мен теміржол қатынасы тоқтатылды. Қызыл деңгейдегі ескерту жарияланып, 14 өзен мен 10 су қоймасында су деңгейі қауіпті деңгейге жетті. Қауіпсіздік қызметтері соңғы 48 сағатта 9 мыңнан астам жедел әрекет жасады. Кордова әуежайы жабылды, электр және байланыс жүйесінде ақаулар бар.

Андалусия үкіметінің басшысы Хуан Мануэль Морено: «Бір күнде Лондонның бір жылдық нормасына тең жауын жауды. Мұндай жағдай бұрын-соңды болмаған», — деп мәлімдеді.

Португалияда:

Лейрия округінде екі адам қаза тапты: бірі сел кезінде көлігімен, екіншісі шатырдан құлап. Тежу, Мондегу және Саду өзендері бойындағы аумақтар су астында қалды. Лейрия қаласында жағдай «сыни деңгейде» деп бағаланды. Елде төтенше жағдай режимі 15 ақпанға дейін ұзартылды.

Метеорологтар «Леонардо» дауылынан кейін ертеңнен бастап жаңа «Марта» дауылы күтілетінін ескертті. Су деңгейі жоғары өзендерде жаңа жауын-шашын аса ауыр зардаптарға әкелуі мүмкін.

Бүгін, 17:51