Италия мен Түркия жағалауында мигранттар мінген қайық апатқа ұшырады

Басылымның жазуынша, патрульдік кеме халықаралық суларда, аралдан шамамен 160 шақырым қашықтықта адамдарға толы қайықты байқаған. Құтқарушылар жеткен кезде борттағы 77 адамның бір бөлігі көз жұмып үлгерген. Алдын ала мәлімет бойынша, олар гипотермиядан және қайық түбінде жиналған көмірсутек буларынан уланған.

Лампедуза аралы Солтүстік Африкадан Жерорта теңізі арқылы Еуропаға бет алған мигранттар үшін негізгі бағыттардың бірі болып береді. Бұл қауіпті сапар кезінде көптеген адам көз жұмады. Халықаралық көші-қон ұйымы дерегінше, биыл жылдың басынан бері Жерорта теңізінің орталық бөлігінде 624 адам қаза тапқан немесе хабар-ошарсыз кеткен. Ал өткен жылы бұл көрсеткіш 1300-ден асқан.

Тағы бір қайғылы оқиға Эгей теңізі аймағында тіркелді. Мугла провинциясы жағалауында үрлемелі қайық аударылып, 19 адам қаза тапты. Қаза болғандардың арасында бала да бар.

Түркия жағалау күзеті мәліметінше, ондаған мигрант мінген қайық патрульдің бірнеше рет тоқтау туралы ескертуіне бағынбай, жоғары жылдамдықпен қашуға тырысқан. Соның салдарынан қайық аударылып кеткен. Кемінде 20 адам құтқарылған.

Аймақ губернаторы Идрис Акбыйктың айтуынша, барлық мигрант Ауғанстан азаматтары болған. Олар Грекия аралдарына қарай бет алған.

Италиямен қатар, Грекия да Таяу Шығыс, Африка және Азия елдеріндегі қақтығыстар мен кедейліктен қашқан адамдар үшін Еуропаға кіретін негізгі бағыттардың бірі саналады. Көп жағдайда мигранттар Түркия жағалауынан жақын маңдағы грек аралдарына дейін қысқа, бірақ аса қауіпті жолды теңізге жарамсыз шағын қайықтармен жүзіп өтеді.

Бұған дейін де наурыз айында Италия жағалауында заңсыз мигранттар мінген қайық аударылғаны хабарланған еді.