Италияда алып акула жағажайдағы адамдарды шошытты

Фото: Bild

Алғашында қорқынышты көрінгенімен, акула ешкімге қауіп төндіре алмады. Өйткені ол әлдеқашан өліп қалған еді. Теңіз толқыны оның денесін Тоскана аймағының оңтүстік-батысындағы танымал Фоллоника жағажайына шығарып тастаған.

Мамандардың айтуынша, бұл – сирек кездесетін алтыжелбезекті доғалтұмсық акула. Ол әдетте теңіздің терең қабатында тіршілік етеді және тек түнде ғана таяз суға жақындайды. Сондықтан адамдар оны өте сирек көреді.

Маңғыстауда 40 млн жыл бұрынғы акула тістері табылды

Жағаға жақындаған кезде суға сүңгуге арналған маска таққан бес жасар бала сапборд үстінен еңкейіп, өлі акуланың алып көздерін көрген. Әкесі жергілікті басылымға берген сұхбатында баланың қатты қорқып, жылап жібергенін айтты.

«Алдымен ол акуланың аузын көріп, «әке, судың астында алып балық бар» деді. Қатты шошып, бірден жағаға шыққысы келді, дейді әкесі.

Антарктика суларында алғаш рет акула табылды

Салмағы 500 келіден асатын акуланы жағалау күзетінің қызметкерлері қайыққа тиеу үшін екі сағаттай уақыт жұмсаған. Кейін оны жергілікті тұрғындар мен туристердің көз алдында арнайы техникамен алып кеткен.

Теңіз биологтары ұзындығы 4,5 метр болатын ұрғашы акуланы зерттегенімен, оның неден өлгенін анықтай алмады.

«Жануардың денесінде ешқандай жарақат та, шіру белгілері де болған жоқ», дейді зерттеуге қатысқан профессор.

Акула да ән тыңдайды

Ал ерекше оқиғаның куәсі болған бала қазір алып акуланың үлкен көздері мен ақсиған тісін көргенін мақтанышпен айтып жүр.