Jas Tolqyn жеңімпаздары Мәскеуде өнер көрсетті

«Жас толқын» байқауының жеңімпаздары Мәскеуде өнер көрсетті. Көбі «Каспий құбыр консорциумы - дарынды балаларға» атты халықаралық фестивальдің бас жүлдесін иеленіп қайтты. Фестивальде еліміздің намысын қорғаған жас өнерпаздардың сапарына биыл да Каспий құбыр консорциумы бастамашы болды.

Мәскеуге Атырау, Маңғыстау, Ақтөбе және Оралдан 40-қа жуық жас өнерпаз барды. Олар Астрахань, Элиста, Краснодар және Новороссийск қалаларынан келген қатысушылармен бақ сынады. Жас өнерпаздардың талантын шыңдайтын бәсекеде Айым Гельманова талғампаз әділ-қазылардың жоғары бағасына ие болды. Қазақтың дәстүрлі әнін шырқап, қалың көрерменнің қошеметіне бөленді.  

Айым Гельманова, «Jas Tolqyn» байқауының жеңімпазы:

- Бұл байқау үш турдан тұрды. Бірінші тур іріктеу болды. Сол іріктеумен Ақтауға өттім. Ақтау қаласына Қамшыгер әнін апардым. Бас жүлде алдым. Енді 3-тур Мәскеуде болып жатыр. Гран-при жүлдесіне ие болдым. 

Бұл жолы фестиваль аясында Ресейдің танымал мәдениет қайраткерлері вокал, би, классикалық аспаптар бойынша шеберлік сабақтарын өткізді. Сондай-ақ қазақстандық жас өнерпаздар Мәскеудің тарихи және көрікті орындарын да аралады.

Қайыргелді Қабылдин, «КҚК-Қ» АҚ Бас директорының ҚР Үкіметімен байланыс жөніндегі орынбасары:

- Біз әлеуметтік жауапкершілігімізді әрқашанда жалғастырамыз. Балаларымыз осы байқауға қатысып, болашақта қазақтың дәстүрін, мәдениетін өркендететін, үлкен жұлдыздар болады деп сенемін.  

Дәстүрден жаңылмай, «Жас толқын» байқауы биыл осымен алты рет өтті. Алғашқы іріктеуге батыс өңірлерінің қала мен шалғай ауылдарынан екі мыңнан аса жас өнерпаз қатысуға ниет білдірген. Ақтық сайысқа жолдама алған қазақстандық жастар үшін бұл үлкен сахнаға алғашқы қадамы болды. 

Авторлары: Зайнұр Байжігіт, Наргиз Рахимжан, Алексей Мжельский