Қазақстан Камератасы Сеул сахнасында өнер көрсетті

Оңтүстік Кореяда қазақ музыкасы жаңғырды, деп хабарлайды 24KZ. Сеулде алғаш рет «Қазақстан Камератасы» мемлекеттік ансамблі өнер көрсетті. Алматыдан барған виртуоздар корей көрермені жақсы білетін классикалық туындыларды орындады.

«Қазақстан Камератасы» ансамблінің музыканттары сеулдік тыңдармандарға қазақтың ұлттық музыкасын паш етті. Алдымен Нұрғиса Тлендиевтің «Саржайлау» шығармасын, артынша Шәмші Қалдаяқовтың әнін орындады.

Қазір Қазақстан әнұранның авторы Шәмші Қалдаяқовтың туындысы орындалады. «Бәрінен де сен сұлу» әнінде қазақ халқының жан дүниесі жатыр. Тыңдай отырып, Қазақстанды жүрегіңізбен сезінесіз.

Бағдарламада классикалық шығармалар да көп болды. Соның бірі – поляк композиторы Кшиштоф Пендерецкийдің сирек орындалатын «Тотальдық виолончель» туындысы. Онда музыкант ішекті тартып қана қоймай, аспаптың сыртынан соғып та, өзгеше дыбыстар береді. Бұл күрделі солоны халықаралық байқаулардың лауреаты Салауат Кәрібаев кәсіби деңгейде орындады.

Гауһар Мырзабекова, ҚР халық әртісі:

- Корей көрермендері Чайковскийді ерекше жақсы көреді, сондықтан бүгін бағдарламада оның шығармалары көп болды. Бірақ біз қазақ музыкасын да кеңінен таныстыруға тырыстық. Тіпті Пендерецкийдің ерекше туындысы да орындалды. Виолончельдегі солоны біздің жас музыкант өте шебер алып шықты.

Концерт Қазақстан Елшілігінің қолдауымен Сеулдің Янчхон ауданында өтті. Бұл ауданның тұрғындары қазақ өнерімен бұрыннан таныс. Янчхонның өнер және мәдениет қоры қазақстандық орындаушыларды жиі шақырады.

Чон Дон Хи, Янчхон өнер және мәдениет қорының төрағасы:

- Өткен жылы Алматы корей театрымен меморандумға қол қойдық. Ал биыл «Қазақстан Камератасы» оркестрімен ынтымақтастық туралы келісім жасалды. Бізге әлемге танымал ұжымның келуі – үлкен қуаныш.

Ли Да Хён, Сеул тұрғыны:

- Классикалық музыканы жиі тыңдаймын, бірақ тірі концерт – мүлде бөлек әсер. Бүгінгі виолончель солосы ерекше ұнады. Өнердің арқасында Қазақстан мен Корея бір-біріне жақындай түседі деп ойлаймын.

Янчхон мәдени қоры қазақстандық әртістерді болашақта да шақыруға ниетті. Бұл сахнада классикалық ансамбльдермен қатар эстрада орындаушылары өнер көрсетеді және рок-фестиваль да жиі өтеді.

Авторлары: Владислав Цой, Ольга Лян