Кабо Вердеде ішек инфекциясынан 4 британиялық турист қайтыс болды

Irwin Mitchell заң фирмасының мәліметінше, қайтыс болғандар қатарында Бедфордширден 55 жастағы Марк Эшли, Бирмингемнен 64 жастағы Элена Уолш, Глостерширден 64 жастағы Карен Пули және аты-жөні жарияланбаған 56 жастағы ер адам бар. Барлығы 2023 жылы Африканың батыс жағалауындағы архипелагқа барған кезде ауырған. Сонымен қатар 2023 жылдың қаңтарынан бері Кабо-Вердеде демалған 6 британиялық турист қайтыс болғаны анықталды.

Irwin Mitchell компаниясы алты отбасының денсаулыққа зиян келтірілгені туралы талап арыз бергенін хабарлады. Tui туроператоры шағымдарды тексеріп жатқанын және ауру белгілері байқалған клиенттерге қолдау көрсетілгенін мәлімдеді.

Марк Эшлидің жұбайы Эмма күйеуінің қайтыс болуына байланысты қатты күйзеліске түскенін айтты. Қазан айында демалыстың үшінші күнінде Марк іш ауруы, диарея, құсу, жоғары температура және әлсіздік белгілерін сезінген. Сапар Tui арқылы брондалып, құны 3 мың фунт стерлингтен асқан. 9 қазанда Эмма туроператордың қосымшасы арқылы күйеуінің жағдайы туралы хабарлап, Сал аралындағы қонақүйдің санитарлық жағдайының нашар екенін атап өткен. Ауру белгілері Ұлыбританияға оралғаннан кейін де сақталған. 12 қарашада қант диабетімен ауыратын Эшли Хоутон-Реджистегі үйінде есінен танып, ауруханаға жеткізілген соң қайтыс болды. Полиция оның өлімінің себебін анықтап жатыр.

Медбике Элена Уолш 2025 жылдың тамызында Сал аралындағы Riu Cabo Verde курортында демалып жүрген кезде қайтыс болды.

Карен Пули 7 қазанда құрбысымен бірге Tui арқылы сатып алған екі апталық демалысқа Салға барған. 11 қазанда әйелде диарея пайда болып, келесі күні тоңазытқыштан аққан суға тайып құлап, жамбасын сындырып алған. Ол жергілікті емханаға жеткізіліп, төрт күн бойы диарея мен құсу белгілері сақталған. 16 қазанда санитарлық авиациямен Тенерифеге эвакуацияланып, келесі күні қайтыс болды. Оның күйеуі Энди Пули әйелінің ауыр жағдайда болғанын және емхана мен туроператор арасындағы байланыс нашар болғанын айтты. Кабо-Верде билігі берген өлім туралы куәлікте өлім себебі көп ағзалық дерт, сепсис, жүрек пен тыныс алу қызметінің тоқтауы және жамбас сынуы деп көрсетілген.

56 жастағы тағы бір ер адамның өлімі туралы толық ақпарат жарияланған жоқ. Басқа құрбандар қатарында 2023 жылдың қаңтарында Сал аралында қайтыс болған 62 жастағы Джейн Пресли (Гейнсборо қаласынан) және 2024 жылдың қарашасында ұқсас аурудан көз жұмған 60 жастағы Уотфорд тұрғыны бар.

Irwin Mitchell заңгері Джатиндер Пол курорттарда ішек инфекцияларының кең таралуы мен қайталануына байланысты алаңдаушылық білдірді. Ол қазіргі уақытта Кабо-Вердеге барып ауырған 1500-ден астам адамның мүддесін қорғайтындарын айтты.

Tui компаниясы сот ісі қаралып жатқандықтан толық түсініктеме бере алмайтынын, алайда барлық шағымды зерттеуді жалғастыратынын мәлімдеді. Компания 2022 жылдан бері архипелагқа миллионнан астам турист жібергенін және денсаулық мәселелері туралы хабарлаған барлық клиентке көмек көрсеткенін атап өтті.