Канададағы мектепте 10 адамды атып өлтірді

Британдық Колумбия провинциясындағы Тамблер-Ридж қаласының жоғары мектебінде атыс болды. 10 адам қаза тауып, тағы 25 адам жараланды. Бұл туралы Канаданың Корольдік атты полициясы (RCMP) мәлімдеді, деп хабарлайды Arasha.kz.

Полицейлер оқиға орнына келгенде, мектеп ғимаратынан алты адамның мәйітін тапқан. Тағы бір зардап шегуші ауруханаға бара жатқан жолда көз жұмды. Екі қаза тапқан адам тұрғын үйден табылды.

Күдікті атқыштың өлі денесі табылды. Алдын ала мәлімет бойынша, ол өз-өзіне қол жұмсаған.

Бастапқыда күдікті ретінде көйлек киген, қоңыр шашты әйел сипатталған болатын. Полиция бұл ақпаратты ресми түрде растаған жоқ. Қазіргі уақытта құқық қорғау органдары аумақты тексеріп, басқа да зардап шеккендерді іздестіруді жалғастыруда.

Тамблер-Ридж мектебінде 7-12 сынып аралығында 170-ке жуық оқушы білім алады. Оның жанында бастауыш мектеп орналасқан. Екі оқу орны да апта соңына дейін жабылды.

Полиция шабуылдаушының кім екені анықталғанын растады, бірақ қылмыстың себебі әзірге белгісіз.