Кәрім Мәсімовке тиесілі қымбат жылжымайтын мүлік аукционға қойылды

«Қайтарылған активтерді басқару компаниясы» ЖШС Астанадағы элиталық тұрғын үй кешендерінде орналасқан бірқатар жылжымайтын мүлік пен басқа да активтерді сатуға шығарды.
Бұл туралы электрондық сауда платформасында жарияланды. Мәліметке сәйкес, 18-20 ақпан аралығында sauda.e-qazyna.kz сайтында бірнеше нысан бойынша аукцион өтеді. Саудаға Кәрім Мәсімовпен байланыстырылатын қымбат пәтерлер мен автотұрақ орындары қойылған.

Атап айтқанда, «Парижский квартал» тұрғын үй кешеніндегі пәтерлер мен паркинг орындары, соның ішінде ауданы 309,5 шаршы метр болатын екі қабатты пәтер бар. Оның бастапқы бағасы – 363,2 млн теңге. Сонымен қатар, «Green Village» тұрғын үй кешеніндегі 231,8 шаршы метрлік пәтер 214 млн теңгеден, ал «Миланский кварталдағы» коммерциялық нысан 353,7 млн теңгеден саудаға ұсынылған.

Жылжымайтын мүліктен бөлек, аукционда бұған дейін бірнеше рет сатылымға шыққан белгілі активтер де бар. Олардың қатарында бастапқы бағасы 461 312 теңге болатын самурай қылышы және ұлттық ою-өрнекпен көмкерілген былғары белбеу (183 750 теңге) бар.

Аталған активтердің барлығы электрондық аукцион арқылы сатылатын болады.