Қайрат Сатыбалдыға тиесілі болған Kaisar Plaza аукционға қойылды

Алматыдағы Kaisar Plaza сауда-кеңсе орталығы аукцион арқылы сатылымға шығарылады.
Бұған дейін нысан кәсіпкер Қайрат Сатыбалдының бизнес активтері қатарында болған.

Сауда-саттық 7 сәуір күні сағат 10:00-де өтеді. Өтінімдер сол күні 09:55-ке дейін қабылданады. Ғимараттың бастапқы бағасы – 61,5 млрд теңгеден асады, кепілдік жарна 9,23 млрд теңге. Баға ҚҚС-сыз көрсетілген.

Сатылымға қойылған 9 қабатты орталықтың жалпы аумағы 63 920 шаршы метр. Қазіргі уақытта ғимарат сенімгерлік басқаруда, онда 53 жалға алушы бар.

Құжаттарда нысан аумағына қатысты айырмашылық анықталған: техникалық паспортта 56 480 шаршы метр деп көрсетілген. Айырма қайта өлшеу және панорамалық қабаттың шатыр ретінде есептелуіне байланысты туындаған.

2025 жылғы желтоқсандағы бағалау есебінде Kaisar Plaza-ның нарықтық құны 47,3 млрд теңге деп белгіленген. Алайда аукциондағы бастапқы баға бұл көрсеткіштен жоғары.