Кәсіпкерлікке 300 млрд теңгеден астам қаржылай қолдау көрсетілді

Бүгін, 29 қазанда, елімізде Кәсіпкерлер күні атап өтілуде. Бұл – жұмыс орындарын ашып, экономиканы дамытып, халықтың әл-ауқатын арттыруға үлес қосып жүрген кәсіп иелерінің кәсіби мерекесі.

Айта кетейік, дәл осы күні, 2015 жылы Қазақстан Республикасының Кәсіпкерлік кодексі қабылданған болатын. Бұл құжат кәсіпкерлік, инвестициялық және бәсекелестік саясатты біріктіріп, бизнесті қолдаудың бірыңғай мемлекеттік жүйесін қалыптастырды.

Бүгінде Қазақстанда 2,4 миллионға жуық кәсіпкерлік субъектісі тіркелген. Олар 4 миллионнан астам адамды жұмыспен қамтып отыр. Шағын және орта бизнестің ел экономикасындағы үлесі 38,9%-ға жетіп, жеке сектордың тұрақты дамудағы маңызын айқындайды.

2025 жылдың басынан бері кәсіпкерлерге көрсетілген қолдау шаралары аясында:

2 300-ден астам жоба 312 млрд теңге несие сомасына субсидияланды Субсидия көлемі – 125,8 млрд теңге 11 мыңнан астам адам кәсіпкерлік негіздеріне оқытылды 109 мыңға жуық кеңес берілді Кепілдік қоры арқылы 1 794 жобаға 311,9 млрд теңге көлемінде қолдау көрсетілді Оның ішінде 170,1 млрд теңге – берілген кепілдіктер

Жалпы көлемі 750 млрд теңгені құрайтын 12,6% мөлшерлемемен «Өрлеу» жеңілдікті кредиттеу бағдарламасы іске қосылды. Оның ішінде:

300 млрд теңге – «Даму» қорының қаражаты 450 млрд теңге – банк ресурстары Қазірдің өзінде 1 200-ге жуық жоба 407,7 млрд теңгеге қаржыландырылды

Сонымен қатар, «BGOV» ақпараттық жүйесі мен «eGov Business» қосымшасы интеграцияланып, 76 мыңнан астам пайдаланушы 3,6 млн өтініш жолдаған.

Шағын және орта бизнесті дамыту – ұлттық экономиканың тұрақтылығын айқындайтын, орта тапты қалыптастыратын және бәсекеге қабілетті, инновациялық Қазақстан үшін негіз құратын стратегиялық бағыт.

Кәсіпкерлікті дамыту саясаты Мемлекет басшысының тапсырмасына сәйкес, бизнестің бастамасы, жауапкершілігі мен инновацияларына негізделген жаңа экономикалық модель қалыптастыруға бағытталған.

Үкімет іскерлік ахуалды жақсарту, әкімшілік кедергілерді азайту, цифрлық платформаларды енгізу және инновацияларды ынталандыру бойынша жүйелі жұмыс жүргізіп келеді.

Бүгін, 17:15