Каспий жағалауынан ерекше тасбақа байқалды ғалымдар өз болжамдарын айтты

Желіде Каспий теңізінің жағасында, Құрық ауылының маңында байқалған жартылай су рептилиясының видеосы тарады. Бұл қандай түр және оның теңіз жағасына қалай келгенін Lada.kz анықтады, деп хабарлайды Tengri Life.

Осы аптада Құрық ауылы маңындағы құмды жағалауда батпақ тасбақасы таспаға түсіп қалды. Экологтар мен биологтар бұл жаңалықты теңіз жағалауы үшін ерекше құбылыс деп атағанымен, Маңғыстау үшін сенсация емес екенін айтады.

"Олар белгілі бір жерлерде өмір сүреді және құрып кеткен жоқ. Бірақ теңізге қалай келгені түсініксіз, шамасы, олар Каспийге кездейсоқ түсіп қалатын сияқты", - деп түсіндірді биолог, бердвочер Василий Бастаев.

ECO-SOCIAL ҚБ атқарушы директоры Әділбек Қозыбақов бұған дейін Итбалық аралдарында тіркелген жағдайлар туралы айтып берді.

"Егер өзен ағысымен келді деп болжасақ, Жайық пен Еділ өзендерінің сағасы Итбалық аралдарынан өте алыс. Тұщы су тасбақасының теңіз аралына қалай тап болғаны және ең бастысы, өзіне тән емес теңіз ортасында қалай аман жүргені жұмбақ күйінде қалып отыр", - деді ол.

Бастаевтың айтуынша, видеодағы - батпақ тасбақасы, жартылай су рептилиясы. Ол дала тасбақасынан сауытының пішінімен және түсімен, әсіресе басының реңімен ерекшеленеді.

"Саурада батпақ тасбақаларының мекендейтіні жалпы алғанда бұрыннан белгілі, бірақ оны ең алғаш кім және қашан анықтағанын білмеймін", - деп атап өтті ол.

Тасбақаның теңізге қалай түскені белгісіз. Бастаев бұл популяцияның "мұздық" дәуірінен қалғандығы туралы нұсқаны жеткілікті дәрежеде негізделмеген деп санайды.

Тағы бір ғалым бұл жағдайға адам факторы мен балық аулау торларына, соның ішінде браконьерлік құралдарға түсіп қалуы себеп болуы мүмкін деген болжам жасады.

"Мүмкін, көз алдымызда тұзды суда өмір сүруге бейімделген тұщы су тасбақасының жаңа түрі қалыптасып жатқан шығар... Каспий суы ащылығы төмен болып саналады - мұхиттағы 33-36 промиллеге қарсы шамамен 12-13 промилле", - дейді Әділбек Қозыбақов.

Мамандар бұл түрдің өңір үшін жаңа емес екенін, бірақ сұрақтардың көп екенін алға тартады. Олар: жергілікті популяцияның саны мен динамикасы, Саура көлінен тыс жерде қыстауы, басқа популяциялармен генетикалық байланысы.

Олар герпетолог-сарапшылар табиғаттың осы бір жұмбақ құбылысына жарық түсіреді деп үміттенеді.

Бізді Google-дың негізгі дереккөздер тізіміне қосыңыз