Kcell Қазақстанда 5G желісін орнату драйвері: 2200 ден астам базалық станция мен алғашқы өнеркәсіптік Private 5G желісі

Астанада ақпараттық-телекоммуникациялық инфрақұрылымды дамыту мәселелері жөніндегі Үкімет отырысының қорытындысы бойынша «Кселл» АҚ басқарма төрағасы Асқар Жамбакин компанияның негізгі нәтижелерін және бесінші буын желілерін дамыту жоспарларын ұсынған баспасөз брифингін өткізді, деп хабарлайды Egemen.kz.

Асқар Жамбакиннің айтуынша, 5G Kazakhstan ұлттық жобасы аясында Kcell компаниясы 2023-2025 жылдар аралығында 5G желісін жылдам салып, аталмыш технологияның күнделікті өмірге енуін қамтамасыз етті. Нәтижесінде 2 242 дана базалық станциясын орнатылды. Жобаға 300 миллиард теңгеден астам инвестиция салынған. Бұл Қазақстанға мобильді интернет жылдамдығының әлемдік рейтингтегі орнын сегіз сатыға көтерген факторлардың бірі болып, 49-орынға шығуға мүмкіндік берді.

Бүгінде Kcell желісінде тіркелген құрылғылардың жартысынан астамы 5G-ді қолдайды. Абоненттердің 40% дерлік 5G жылдамдығын пайдаланады. Бұл заманауи цифрлық қызметтерге сұраныстың тұрақты өсуін көрсетеді.

Kcell 2026 жылы 567 базалық станцияны пайдалануға беруді жоспарлап отыр, бұл – компанияның цифрландырудағы көшбасшы орнын нығайтады және аймақтық қамтуды кеңейтеді.

Kcell үшін тағы бір даму бағыты - Private 5G корпоративтік шешімдері – орта және ірі кәсіпорындар үшін қауіпсіз желілер болды. Олар геолокацияны, бейнебақылау мен сараптаманы, қашықтан бақылау жүргізуді, push-to-talk байланысын және ұшқышсыз техниканы басқаруды қамтамасыз етіп, экономиканың маңызды секторларының цифрлық трансформациясының технологиялық негізін құрады.

«5G және Private 5G технологиялары цифрлық экономиканың іргетасына айналып келеді. Біз жаңа шешімдер арқылы кәсіпорындардың жұмыс істеу тәсілін қалай өзгертіп, қауіпсіздік пен тиімділікті арттырып жатқанын көріп отырмыз. Дегенмен, 5G әлеуетін толық ашу үшін ұялы байланыс операторлары мен Үкіметтің жүйелі жұмысы қажет», деп атап өтті «Кселл» АҚ басқарма төрағасы Асқар Жамбакин.

Бүгінде Kcell елімізде бірінші болып өнеркәсіптік нысандарда бесінші буын технологияларын іс жүзінде қолданылуын көрсететін Private 5G жобасын іске қосып, өнеркәсіп және тау-кен секторында 10 жобаны жүзеге асырды.