Kcell компаниясы Қазақстандағы 5G желісін орнату драйверіне айналады

Астанада өткен ақпараттық-телекоммуникациялық инфрақұрылымды дамыту мәселелері жөніндегі үкімет отырысының қорытындысы бойынша «Кселл» АҚ басқарма төрағасы Асқар Жамбакин компанияның жетістіктері мен 5G желілерін дамыту жоспарын баяндады, - деп хабарлайды Aikyn.kz.

Асқар Жамбакиннің айтуынша, 5G Kazakhstan ұлттық жобасы аясында Kcell компаниясы 2023-2025 жылдар аралығында 5G желісін жылдам енгізіп, жаңа технологияның күнделікті өмірге енуін қамтамасыз етті. Осы кезеңде компания 2 242 базалық станция орнатты. Жобаға 300 миллиард теңгеден астам инвестиция салынған. Осылайша Қазақстан мобильді интернет жылдамдығы бойынша әлемдік рейтингте сегіз саты жоғарылап, 49-шы орынға көтерілді.

Қазіргі таңда Kcell желісінде тіркелген құрылғылардың жартысынан көбі 5G технологиясымен жұмыс істейді, ал абоненттердің шамамен 40%-ы 5G жылдамдығын пайдаланады. Бұл цифрлық қызметтерге сұраныстың өсіп келе жатқанын білдіреді.

Kcell 2026 жылы 567 базалық станцияны іске қосуды жоспарлап отыр. Бұл қадам компанияның цифрландыру саласындағы көшбасшы ретіндегі орнын одан әрі күшейтіп, желінің аймақтық қамтуын кеңейтеді.

Компанияның тағы бір даму бағыты – Private 5G корпоративтік шешімдер. Бұл – орта және ірі кәсіпорындарға арналған қауіпсіз желілер. Олар геолокация, бейнебақылау, сараптама, қашықтан бақылау, push-to-talk байланысы және ұшқышсыз техниканы басқару мүмкіндіктерін береді. Осы арқылы экономикадағы маңызды салалардың цифрлық трансформациясына негіз бола алады.

«5G және Private 5G технологиялары цифрлық экономиканың іргетасы саналады. Біз жаңа технологиялар кәсіпорындардың жұмыс істеу тәсілін қалай өзгертетінін, қауіпсіздік пен тиімділікті арттыратынын көріп отырмыз. Дегенмен, 5G әлеуетін толық іске асыру үшін ұялы байланыс операторлары мен үкіметтің бірлескен жүйелі жұмысы қажет», – деді Асқар Жамбакин.

Бүгінде Kcell елімізде алғашқылардың бірі болып өнеркәсіптік нысандарда Private 5G технологиясын енгізіп, тау-кен және өнеркәсіп салаларында 10 жобаны жүзеге асырды.