Кейбір жұмыссыздар 1 миллионға дейін алады . Қазақстанда төлем жүйесі өзгереді

Еңбек және халықты әлеуметтік қорғау министрі Асқарбек Ертаев Қазақстанда Мемлекеттік әлеуметтік сақтандыру қорынан (МӘСҚ) төленетін төлемдер механизмі өзгеретінін растады. Бұған қазақстандықтардың өздері жүгінетін "көлеңкелі" схемалар себеп болып отыр, - деп хабарлайды Tengrinews.kz.

Еңбек және халықты әлеуметтік қорғау министрі Асқарбек Ертаев Қазақстанда Мемлекеттік әлеуметтік сақтандыру қорынан (МӘСҚ) төленетін төлемдер механизмі өзгеретінін растады. Бұған қазақстандықтардың өздері жүгінетін "көлеңкелі" схемалар себеп болып отыр, - деп хабарлайды Tengrinews.kz.

Үкіметте өткен брифингте Ертаевтан жаңа Әлеуметтік кодекс аясында қазақстандықтардың МӘСҚ-тан алатын төлемдері "айтарлықтай қысқаратыны" рас па деп сұрады.

"Күзде сіздің ведомство "Ашық НҚА" порталында жаңартылған Әлеуметтік кодексті жариялады, пікір қалдырушылардың айтуынша, бұл құжат Мемлекеттік әлеуметтік сақтандыру қорынан төлем алу мүмкіндіктерін айтарлықтай шектейді. Халық бұл шаралар қордың дефолтына жол бермеу үшін жасалып жатыр деп болжады. Еңбек министрлігі бұл түзетулерді енгізуді шынымен жоспарлап отыр ма? МӘСҚ дефолт алдында тұрғаны және қордың қаржылық тұрақтылығын қарапайым қазақстандықтар есебінен (...) сақтап қалу көзделіп отырғаны рас па?" - деген сауал қойылды.

Асқарбек Ертаев мұндай болжам жоқ екенін айтты.

"Қор тұрақты жұмыс істеп тұр. Қорға қаражат түсіп жатыр. Тіпті көрсеткіштер бойынша қордың теңгерімі оң нәтиже көрсетіп отыр", - деді министр.

Анықтама: МӘСҚ - бұл әлеуметтік тәуекелдер (жұмысынан, табысынан, еңбекке қабілеттілігінен айырылу) туындаған кезде жұмыс істейтін азаматтарға әлеуметтік көмек төлеу үшін құрылған Қазақстандағы мемлекеттік әлеуметтік сақтандыру қоры. Қор жұмыс берушілердің, жеке кәсіпкерлердің және жеке практикамен айналысатын адамдардың міндетті әлеуметтік аударымдары есебінен қалыптасады. Қаражат жұмысшылардың жалақысынан ұсталмайды.

Бұл ретте Ертаев МӘСҚ-тан төленетін төлем мөлшерлері бойынша өзгерістер шынымен де күтілетінін растады.

"Иә, ондай өзгерістер бар, мен оны растаймын. Бұл қордан қазіргі уақытта анықталып жатқан кейбір схемаларға байланысты. Соңғы мысалдардың бірін келтірейін. Бір бухгалтер 10 ұйымда жұмыс істеген және жеке кәсіпкер болған. Яғни, ол 10 ұйымда бухгалтер болып істеп, бірден барлығынан жұмыстан шығады да, қорға жұмыссыз қалғаны туралы өтініш береді. Қор ережелеріне сәйкес, төлемдер оның соңғы орташа жалақысы ескеріле отырып берілуі тиіс. Қазір төлемдердің ең жоғарғы шегі қайта қаралып жатыр", - деді министр.

Шенеунік пандемияға дейін Қазақстанда 4 ай бойы жұмыс істемеген адам жұмыссыз деп саналғанын түсіндірді. Пандемия кезінде бұл мерзім 6 айға дейін ұзартылған.

"Біз жұмыссыздық бойынша жәрдемақыны 4 айға дейін қысқартып жатырмыз. Бұл мәселе қазір талқыланып жатыр, оны күн тәртібіне шығарып отырмыз. Әйтпесе, кеше ғана жұмыстан шығып, 3 күннен кейін бірден жұмыссыздық бойынша жәрдемақы алуым керек деп өтініш түсіретін жағдайлар өте көп. Мұндай жайттар болып жатыр. Азаматтарға тиесілі емес артық төлемдерге жол бермеу үшін төлемдер бойынша өзгерістер болады", - деді Ертаев.

Оның айтуынша, мұндай өзгерістердің мақсаты - "қор айналасында пайда болған" көлеңкелі схемаларды жою.

"Өтініш беріп, төлем алғысы келетін азаматтар бар. Бізде жұмыссыз ретінде 1 миллион теңгеге дейін алатын жағдайлар бар. Олай болуы мүмкін емес қой (...) Біз бұл есептеулерді қайта қарап, жәрдемақының белгілі бір мөлшерін айқындаймыз. Қазір төлемнің ең жоғарғы деңгейі жоқ, енді белгілі бір шек болады. Азаматтарға тиесілі барлық төлем төленеді", - деп толықтырды Еңбек министрлігінің басшысы.

Google News арқылы жаңалықтарымызды қадағалаңыз