Қазақстанда кейбір әскери қызметшілер үш еселенген төлем алады

Қазақстанда әскери қызметшілерге төтенше жағдайларды жоюға, антитеррорлық операцияларға қатысқаны және төтенше жағдай режимін қамтамасыз еткені үшін үш еселенген мөлшерде ақшалай үлес төленеді. Сенат депутаттары тиісті түзетулерді қарады, деп хабарлайды Tengrinews.kz.

Қазақстанда әскери қызметшілерге төтенше жағдайларды жоюға, антитеррорлық операцияларға қатысқаны және төтенше жағдай режимін қамтамасыз еткені үшін үш еселенген мөлшерде ақшалай үлес төленеді. Сенат депутаттары тиісті түзетулерді қарады, деп хабарлайды Tengrinews.kz.

Сенаторлар "Кейбір заңнамалық актілерге әскери қызметшілердің құқықтық жағдайын, қорғаныс және әскери қызмет мәселелерін жетілдіру бойынша өзгерістер мен толықтырулар енгізу туралы" заңды қарады.

Комитет төрағасы Андрей Лукиннің сөзінше, құжат "Қорғаныс және Қарулы Күштер туралы", "Әскери қызмет және әскери қызметшілердің мәртебесі туралы" және "Бітімгершілік қызмет туралы" заңдарға түзетулер енгізуді көздейді.

Атап айтқанда, шетелдегі әскери өкіл аппаратының құқықтық мәртебесі заң жүзінде бекітіледі, оны қаржыландыру тәртібі айқындалады, сондай-ақ мұндай аппараттарда қызмет ететін әскери қызметшілердің лауазымдары дипломатиялық қызмет қызметкерлерінің лауазымдарына теңестіріледі.

Бұдан бөлек, бірқатар өзгеріс әскери қызметшілердің әлеуметтік және құқықтық қорғалуын күшейтуге бағытталған.

Мәселен, Қарулы Күштер мен Шекара қызметінің әскери қызметшілері төтенше жағдайлардың салдарын жоюға, антитеррорлық операцияларды өткізуге және төтенше жағдай режимін қамтамасыз етуге қатысқан кезде үш еселенген мөлшерде ақшалай төлем ала алады.

Сондай-ақ әскери лауазымдарды иеленбейтін және қылмыстық іс бойынша күдікті деп танылуына немесе бұлтартпау шарасының қолданылуына байланысты командирдің немесе бастықтың қарамағында жүрген әскери қызметшілерге ең төменгі жалақы мөлшерінде төлемдер қарастырылған.

Талқылау қорытындысы бойынша Сенаттың Халықаралық қатынастар, қорғаныс және қауіпсіздік комитеті заң жобасын мақұлдауды ұсынды. Құжат әскери қызметшілердің құқықтық жағдайын жетілдіруге, сондай-ақ қорғаныс және әскери қызмет мәселелерін реттеуге бағытталған.

Бұған дейін Голан жоталарындағы БҰҰ миссиясына жіберілетін қазақстандық әскери қызметшілерге ай сайын үш еселенген ақшалай үлеске тең төлем, сондай-ақ ұйым бюджетінен төлемдер төленетіні туралы жазған едік.

Қазақстандық бітімгерлер сондай-ақ Ливан, Сирия, Батыс Сахара, Оңтүстік Судан, Конго Демократиялық Республикасы және Орталық Африка Республикасындағы миссияларға қатысып жатыр.

Тағы оқыңыз: Қазақстан БҰҰ ең қиын миссияларының біріне бітімгерлерді жіберді

Google News арқылы жаңалықтарымызды қадағалаңыз