Кейінгі 5 жылда ауыл шаруашылығы кооперативтерінің саны 53% өскен семинар кеңес

Іс-шара Мемлекет басшысының кооперацияның тиімді әрі тұрақты моделін қалыптастыратын жаңа салалық заң әзірлеу жөніндегі тапсырмасын іске асыру аясында ұйымдастырылды.

Жиында Ауыл шаруашылығы вице-министрі Ермек Кенжеханұлы аталған мәселе елдің агроөнеркәсіптік кешенін ілгерілетудің маңызды құралдарының бірі екенін атап өтті. Бұл азық-түлік қауіпсіздігін қамтамасыз етіп, ауыл тұрғындарының табысын арттыруға мүмкіндік береді.

- Соңғы 5 жылда тіркелген ауыл шаруашылығы кооперативтерінің саны 53%-ға өсіп, 4,5 мың бірлестікке жетті. Өндіріс көлемі 2 есеге артты, ал кооперативтердегі мал басы 52,5%-ға көбейді. Саланың бұлай қарқынды дамуы, ең алдымен, мемлекеттік қолдау шараларының кеңейтудің нәтижесі. Осы ретте, «Ауыл аманаты бағдарламасы» аясындағы жеңілдетілген қаржыландыру және кооперативтерді тіркеу рәсімдерін оңайлату маңызды рөл атқарды, - деді ол.

Вице-министрдің сөзіне қарағанда, бүгінде Үкімет ауыл шаруашылығы кооперациясын дамытуға бағытталған кешенді ынталандыру шаралары іске асырылып жатыр. Олардың қатарында мемлекеттік қолдаудың барлық түрлеріне тең қолжетімділік, салықтық жеңілдіктер, ауыл шаруашылығы мақсатындағы жерлерді беру кезінде қосымша балл түріндегі артықшылықтар, сондай-ақ білім тарату орталықтары базасында фермерлер мен жеке қосалқы шаруашылықтарды оқыту бар.

Сондай-ақ вице-министр кооперацияның дамуын тежейтін негізгі мәселелерді де алға тартты. Мәселен, халық арасында ұжымдық шаруашылық жүргізудің артықшылықтары туралы жүйелі түсіндіру жұмыстарының әлсіздігі, басқарушылық құзыреттердің жеткіліксіздігі, қаржылық мүмкіндіктердің шектеулілігі және басқа да факторлар бар.

Жиын барысында кооперативтерді құрудың негізгі мақсаты өндіріс көлемін арттыру, сервистік қызметтерді қамтамасыз ету және бірлескен қайта өңдеуді ұйымдастыру мүмкіндіктерін кеңейту екені баса айтылды.

Қазіргі таңда елімізде 1,6 млн жеке қосалқы шаруашылық (ЖҚШ) бар. Бүгінде сүттің 61%-ын және еттің 44%-ын өндіретін осы қосалқы шаруашылықтар ауыл тұрғындарын жұмыспен қамтуда да маңызды рөл атқарып отыр.

- ЖҚШ-лардың саны көп әрі өндіріс көлемі жоғары болғандықтан, олар ауыл шаруашылығы ынтымақтастығын нығайту үшін оңтайлы резерв қалыптастырады. Алайда оларға өнімді тұрақты өткізуді қамтамасыз ететін қайта өңдеуші кәсіпорын немесе ірі нарық қатысушысы қажет. Жеке қосалқы шаруашылықтар өндіріс көлемін қамтамасыз етеді, қайта өңдеу кәсіпорындары – тұрақты өткізуді, ал кооперативтер осы тізбектің барлық қатысушыларын байланыстыратын буын ретінде қызмет етеді. Бұл қатысушылардың біртіндеп қанат жаюына және ауқымын кеңейтуіне мүмкіндік береді. Соңғы жылдары дәл осындай тірек кооперация моделі қалыптасты. Біздің міндетіміз – осы қатынастарды заңнамалық деңгейде реттеу, – деп атап өтті Ермек Кенжеханұлы.

Атап өтерлігі, құрамына мүдделі мемлекеттік органдар, қаржы институттары, ғылыми қауымдастық және салалық одақтар кіретін жұмыс тобы түрлі бастамаларды, соның ішінде мүшелік мүмкіндіктерін кеңейту және мемлекеттік қолдау шараларын жетілдіру мәселелерін қарастыруда.

Семинар-кеңес қатысушылары кооперацияның «тірек» моделін енгізудің қажеттілігін қолдай отырып, оның ауылдық аумақтарды дамытудағы тәжірибелік маңыздылығына тоқталды.

Кездесу қорытындысы бойынша бірқатар ұсынымдар әзірленіп, олар уәкілетті мемлекеттік органдарға жолданатын болады.

Ермек Кенжеханұлы семинарда айтылған барлық ұсыныстар кооперативтер қызметінің ашықтығын арттыруға және ауыл тұрғындарының табысын өсіруге бағытталған тиімді заң әзірлеу барысында ескерілетінін жеткізді.

Басқосуға Президент Әкімшілігінің, «Amanat партиясы», Атамекен Ұлттық кәсіпкерлер палатасы, БҰҰ-ның Азық-түлік және ауыл шаруашылығы ұйымы (ФАО), Халықаралық көші-қон ұйымы (ХКҰ), бизнес қауымдастық өкілдері, ғалымдар және жергілікті атқарушы органдардың басшылары қатысты.

Осыған дейін елде өндіріс, ауыл шаруашылығы және жол құрылысы қарқын алғаны туралы жаздық.