Кельнде 100 күндік оқшаулау мен 60 күндік төсек режимі бойынша ерекше тәжірибе басталды

Зерттеуді Германияның аэроғарыш орталығы (DLR) ғалымдары жүргізіп отыр. Экспериментке қатысушылар шағын топ құрамында сыртқы әлеммен байланыссыз, қатаң ережелерге бағына отырып өмір сүреді. Ғалымдар мұндай жағдайлардың адамның денсаулығына, жұмыс қабілетіне және психологиялық күйіне қалай әсер ететінін зерттеуде.

Сонымен қатар параллель түрде төсек режиміне қатысты зерттеу жүргізілуде. Оған қатысқан 12 адам 60 күн бойы төсектен тұрмайды. Ғылыми тәжірибеде салмақсыздық жағдайы модельденген: қатысушылардың төсегі бас жағына қарай 6 градус еңкейтілген.

Мамандардың айтуынша, бұл әдіс ағзадағы сұйықтықтың қайта бөлінуіне әкеледі. Нәтижесінде бұлшықет массасы азайып, тепе-теңдік сезімі нашарлайды, бұл ғарыштағы жағдайға ұқсас.

Зерттеу Ай мен Марсқа ұшуға дайындық аясында жүргізілуде. Ғалымдардың мәліметінше, Айға ұшу шамамен үш күнге созылады, ал Марсқа сапар қолайлы жағдайларда алты айға дейін жалғасуы мүмкін.

Экспериментке қатысушылар «жердегі астронавтар» деп аталады. Олардың деректері болашақта ғарышкерлерді ұзақ мерзімді ұшуларға тиімді дайындауға мүмкіндік береді.

Айта кетейік, бұған дейін Франция ғарышты әскери бағыттардың бірі ретінде белгілегені, ал Қытай коммерциялық ғарыш саласына бірыңғай стандарт енгізіп жатқаны хабарланған болатын.