Кентауда жүздеген адам баспаналы болды

Кентауда соңғы бес жылда 10 көпқабатты үй салынып, жүздеген адам баспаналы болды. Жақында тағы бір үй тапсырылады. Шағын шаһар 2012 жылы моноқалаларды дамыту бағдарламасына енгізілді. Содан бері жолдары жөнделіп, көшелері абаттандырылды. 

Қала тұрғындары ауызсумен толық қамтылды. Дегенмен әлі де шешімін күткен мәселелер бар. Ойын алаңдары жетіспейді. Жаңарған қалаға қоныс аударушылар көбейіп, тұрғын үй тапшылығы сезілуде. 

Кентау - моноқалалар тізіміне енген оңтүстіктегі жалғыз қала. Қалада 5 жылда 10 үй салынса, былтыр 120 пәтерлік 4 үй  кезекте тұрғандар мен банк салымшыларына берілді. Дегенмен – тұрғын үй тапшылығы бар, 9 мыңға жуық адам кезегін күтуде. 

Данияр Байсейітов, қалалық құрылыс, сәулет және қала құрылысы бөлімінің басшысы:

- Алдағы уақытта бас жоспарға сәйкес, көпқабатты тұрғын үй аумағына тағы да тұрғын үйлер салынатын болады. Солай аздап-аздап кезек ретін азайту мақсатында құрылыс жұмыстары жүргізілетін болады.

«Қалада инфрақұрылым саласы едәуір жақсарды», - дейді тұрғындар. Жаңа шағын аудандарға ауызсу желісі, газ құбыры тартылып, жолдарға асфальт төселген. Көшелер жарықтандырылған.

Бекмахан Қалдаров, қала тұрғыны:

- Су бар, жол жасалып жатыр, дұрысталып келе жатыр. Жарық шамдар қойылды. Осы көшенің бәріне былтырдан бері жарық орнатылды. Қойылмаған кішкентай көшелерде бар, солардың бәріне қойылса, әдемі болар еді.

Бағдарлама аясында қалада былтыр үш жүзден астам ескі үй жаңғыртылды. Көпқабатты үйлердің ауласына 67 ойын алаңы салынды. Алайда балалар ойнайтын орындар әлі де болса жеткіліксіз.

Айкүміс Қасымбекова, қала тұрғыны:

- Қаламыз көркейіп жатыр. Соған балалар ойнайтын алаңша болса, әр үйдің ауласына деген ойымыз бар. Соны әкімшіліктен сұраймыз. 

Талғат Ысқақов, қалалық ТҮКШ және тұрғын үй инспециясы бөлімінің басшысы:                                                                                                

- Біз республикалық бюджеттен қаражат сұрау бойынша 33 аулаға жоба жасап, ұсынған болатынбыз. Алайда қаражат әлі бөлінген жоқ. Алайда біз оған қарамастан «Халық қатысатын» жергілікті бюджеттен осындай алаңша орнатып жатырмыз. 2026 жылға 11 ойын алаңшасын орнатуды жоспарлап отырмыз.

Жақында қалада 300 орындық спорт кешенінің құрылысы бастады. Онда күрес, бокс, футбол, баскетбол үйірмелері ашылады. 

Оразбек Қарымбаев, мердігер мекеме өкілі:

- Қыркүйек айынан бастадық жұмысты қаралған қаражат 2 млрд 1 млн теңге. Соған істеп жатырмыз. Бір апта көлемінде кірпішке көшеміз, қалау жұмыстарына. Бітетін уақыты келердің аяғына қазан айында аяқтаймыз.

Ал «Тұран» арнайы экономикалық аймағында кірпіш, бетон, пластик, газ қазандықтарын шығаратын зауыттар жұмыс істейді. Инвесторлар табылып, тың жобалар ұсынса, арнайы аймақтан орын беруге дайынбыз-дейді жауаптылар. Қала билігі қытайлық инвесторларымен бірнеше жобаны жүзеге асыруды жоспарлап тұр. Жалпы қалада 7 мыңға жуық кәсіпкерлік нысаны тіркелген.

Жандос Тасов, қала әкімі:

- Қала жаңа келбетін қалыптастырып жатыр. Экономиканың басқа да секторларын дамытып, ауылшаруашылығы саласы, қызмет көрсету, сауда-саттық саласы да қарқынды дамып отыр. Оның барлығы осы қаланың экономикасына құйылған мемлекеттік қолдаудан берілген қаржының, осы бағдарламаның оң септігінің арқасында деп білеміз. 

Келесі жылы қалаға қарасты Хантағы мен Қарнақ ауылдары газға қосылады. Бұл жобалардың барлығы қала экономикасын әртараптандырып, халықтың тұрмысын жақсартуға серпін беретінін айтады. «Нәтижесінде, Кентау моноқалалар тізімінен шығарылып, ірі қалалар санатына енуі әбден мүмкін», - дейді мамандар. 

Авторлары: Жандос Жұмабек, Ерболат Әбіш