Елімізде 15 мыңнан аса адам баспаналы болды

Қазақстанда Наурыз бағдарламасы табысты жұмыс істеп келеді. Ол Мемлекет басшысы Қасым-Жомарт Тоқаевтың тапсырмасымен іске қосылған болатын. Бағдарлама арқылы бүгінде 15 мыңнан астам азамат жаңа баспанасының кілтін алып, қоныс тойын тойлады. Қазір қайта өтінім қабылдау жүріп жатыр. Оған азаматтар «Отбасы банк» сайтында өтініш бере алады. Ипотека алуға кімнің үміті бар? Оның басты шарттары қандай? 

Наурыз бағдарламасы бойынша берілген баспананың 60 пайызын 35 жасқа дейінгі жастар алған. Солардың бірі - астаналық Ерлік Сапарбеков. Жас актер 2021 жылдан бастап қаржы жинаған. Сөйтіп былтыр мемлекеттік бағдарлама арқылы өз арманын жүзеге асырды.

Ерлік Сапарбеков, актер:

- Қыркүйек айында қатысып көрдім. Көп үміткерлердің арасына кірдім. Негізгі жұмыс кіргеннен кейін басталады екен. Үй таңдау, еңбек ақыны есептеу. Бұйыртып 2024 тің қараша айының сонында баспаналы болдым.

Алматылық Елдос Шұлғабаев та Наурыз бағдарламасы арқылы баспаналы болғандардың бірі. Көпбалалы әке 20 пайыз бастапқы жарна төлеп, шаһардан үш бөлмелі пәтер алған.

Елдос Шұлғаубаев, көпбалалы әке:

- Наурыз бағдарламасының өте ынғайлы жақтары - алғашқы жарнасы төмен. 20 пайызды ғана құясын. Мұнда тек алғашқы нарықтағы үйлерді аласың. Өте жаңа үйлер. Өзіңе ұнаған үйлерді алып, ары қарай әрлеу жұмыстарын жүргізесің. Сондай-ақ тіркеуді қажет етпейді.

«Наурыз» бағдарламасы бойынша бастапқы жарна 2 млн теңгеден басталады. Басты шарт - өзінің, жолдасы немесе кәмелетке толмаған балаларының атында үй болмау керек. Талаптарға сай келмейтіндерді жүйе автоматты түрде өткізбейді. Бұдан бөлек, банк өтініш берушінің төлем қабілетін тексереді. Конкурстан өткен азаматтарға үйді таңдап, несие рәсімдеуге алты ай уақыт беріледі. Жалпы бағдарлама жеті жылға шақталған.

Авторы: Әлішер Әли