Кінәлі деп танып, босатты: Қостанай түбіндегі жарылыс ісі бойынша үкім шықты

Қостанай облысындағы автосервис аумағында үш адамның өмірін қиған жарылыстан екі жарым жыл өткен соң, сот ғимарат иесіне қатысты үкім шығарды. Кәсіпкер кінәлі деп танылғанымен, қылмыстық жауапкершіліктен босатылды, деп хабарлайды Tengrinews.kz тілшісі.

"Амангелді" тұрғын алабындағы автосервистегі жарылыс 2023 жылдың желтоқсанында болған еді. Бір қабатты ғимарат санаулы секундта жермен-жексен болды.

Сол кезде 30 градус аязда құтқарушылар үйіндіні аршып, ғимарат сынықтары астында қалған адамдарды іздеді. Үйінді астынан алты адам құтқарылып, үш адам қаза тапты.

Жарылыс сәті бейнебақылау камерасына түсіп қалған - жазба оқиға ауқымын көрсетіп, әлеуметтік желілерде тез тарады.

Төтенше жағдайдан кейін бірден құтқарушылар қайғылы оқиғаға автосервис ғимаратындағы газ баллон жабдықтарын пайдалану ережелерінің бұзылуы себеп болуы мүмкін деген болжам жасады. Шеберханадағы "Газель" көлігіне орнатылған баллоннан газ шыққан. Кейін бұл нұсқа бір жылдан астам уақытқа созылған тергеу барысында расталды.

Оқиға орнынан түсірілген фотоны Қостанай облысының ТЖД ұсынды

Биыл Қостанайда сот талқылауы басталды. Сот алдында ғимарат иесі жауап берді. Оған Қылмыстық кодекстің бірнеше бабы бойынша, соның ішінде абайсызда адам өліміне әкеп соғу, денсаулыққа ауыр зиян келтіру, сондай-ақ бөтеннің мүлкін жою және бүлдіру бойынша айып тағылды. 27 шілдеде сот іс бойынша шешім шығарды.

"Қылмыстық кодекстің 104-бабының 2-бөлігі ("Абайсызда өлімге әкеп соғу"), 114-бабының 3-бөлігі ("Денсаулыққа абайсызда зиян келтіру"), 204-бабының 2-бөлігі ("Бөтеннің мүлкін абайсызда жою немесе бүлдіру") бойынша қылмыстық құқық бұзушылықтар жасағаны үшін кінәлі деп танылсын және қылмыстық жауаптылыққа тарту мерзімінің өтуіне байланысты қылмыстық жауаптылықтан босатылсын", - деп үкімді № 2 соттың судьясы Олжас Баяқов оқыды.

Сотта айыпталушы кінәсін мойындамай, қылмыстық істі тоқтатуды және ақтау үкімін шығаруды сұрады. Қорғаушы тарап нұсқасы бойынша, жауапкершілік иесінің рұқсатынсыз көлікті алып, оған жанармай құйып, жылытылатын боксқа қойған автосервис қызметкерлеріне де қатысты қаралуы тиіс еді. Алайда, қорғаушылардың пікірінше, бұл әрекеттерге қылмыстық-құқықтық баға берілмеген.

Сот сараптамалар нәтижесі мен басқа да дәлелдемелер жиынтығы сотталушының кінәсін растайды деген қорытындыға келді. Сонымен қатар кәсіпкерге жаза тағайындалған жоқ: ол ескіру мерзімінің өтуіне байланысты қылмыстық жауапкершіліктен босатылды.

"Бурдинский сотқа тартылған қылмыс онша ауыр емес қылмыстар санатына жатады. Қылмыстық кодекстің 71-бабы 1-бөлігі 2-тармағына сәйкес, егер онша ауыр емес қылмыс жасалған күннен бастап екі жыл өтсе, адам қылмыстық жауаптылықтан босатылады", - деп түсіндірді судья шешімді.

Іс материалдарына сәйкес, жарылыс себебі - пайдалану мерзімі өткен және қолданылмауы тиіс газ баллон жабдығы бар "Газель" автокөлігін пайдалану болған.

"Газ баллон жабдығының мерзімі өткен "Газель" маркалы көлік құралы қауіптілігі жоғары көз екенін сезіне отырып, Бурдинский қылмыстық салғырттық танытып, бұл көлікті өз қызметкерлерінің пайдалануына жол берген. Сот отырысында газ баллон жабдығының құжаттар бойынша жоқ екені, көліктің заң бойынша пайдаланылмауы тиіс екені анықталды", - деп түсіндірді үкімді судья Олжас Баяқов.

Еске сала кетейік, 11 желтоқсанда сағат 12:39-да Қостанай маңындағы Амангелді ауылында газ-ауа қоспасының жарылуы салдарынан жүк көліктерін жөндеуге арналған бір қабатты ғимарат құлағаны туралы хабарлама түскен болатын.

Google News арқылы жаңалықтарымызды қадағалаңыз