Қазақстанның солтүстігінде “Қыздар.нет“ ісі бойынша сыбайластарға үкім шықты

Петропавл қаласында "Қыздар.нет" интернет-ресурсы арқылы жеңгетайлықты ұйымдастыруға жәрдемдескен трансұлттық ұйымдасқан топтың ұйымдастырушысы мен қатысушыларына қатысты еліміздегі алғашқы үкім шықты, деп хабарлайды Tengrinews.kz.

Шулы сайтқа қатысты істің қалай тергелгені туралы Солтүстік Қазақстан полицейлері егжей-тегжейлі айтып берді. Өңірлік полиция департаментінің тергеу бөлімшелерінің қызметкерлері кейінгі жылдары тыйым салынған веб-ресурс қызметіне қатысты жеңгетайлық бойынша бес қылмыстық істі сотқа жолдады.

"Осы қылмыстық істердің материалдарын талдау қылмыстық желінің жұмыс істеу схемасын анықтауға және қылмыстық ұйымның келесі деңгейіне шығуға мүмкіндік берді", - деп хабарлады Tengrinews.kz тілшісіне СҚО ПД бастығының бірінші орынбасары Әлібек Қожахметов.

Қылмыстық іс 2025 жылдың мамыр айында тіркелді. Ведомствоаралық жедел-тергеу тобының құрамына СҚО полиция департаменті мен Қаржылық мониторинг агенттігінің қызметкерлері кірді. Жұмыс Ішкі істер министрлігі мен Бас прокуратураның үйлестіруімен жүргізілді.

Әлібек Қожахметовтің айтуынша, тергеу жұмыстары бұрын-соңды болмаған сипатта жүргізілді. Құқық қорғаушыларға цифрлық іздерді зерттеуге, криптовалюта мен халықаралық серверлік инфрақұрылымды пайдалана отырып жасалған транзакцияларды қадағалауға тура келді.

"Өткен жылдың шілде айында Астана және басқа да қалаларда жүргізілген арнайы операция нәтижесінде алты күдікті ұсталды. Тергеу нұсқасы бойынша, олар бүкіл ел аумағында жезөкшелікпен айналысатын тұлғалардың жарнамасының жұмыс істеуін қамтамасыз етіп, ресурсты басқарған және сайт ұйымдастырушыларының мүддесі үшін криптовалютамен операциялар жүргізген", - деп түсіндірді СҚО ПД бастығының бірінші орынбасары.

Тергеу амалдары сегіз ай бойы жүргізілді.

Облыстық прокуратураның нақтылауынша, биыл наурызда прокурорлар тыйым салынған "Қыздар.нет" сайтында интимдік қызметтерді насихаттау мен жарнамалауға жәрдемдескен трансұлттық ұйымдасқан топтың алты қатысушысына айып тақты.

"Топтың заңсыз қызметі белгіленген тарифтер бойынша ақшалай сыйақы үшін интимдік қызмет көрсететін тұлғалардың сауалнамаларын ілгерілетуге негізделген", - деп хабарлады СҚО прокуратурасы.

Фотоны СҚО ПД баспасөз қызметі ұсынған

Биыл маусымда Солтүстік Қазақстан облысының қылмыстық істер жөніндегі мамандандырылған ауданаралық соты ұйымдасқан қылмыстық топтың алты негізгі қатысушысына қатысты үкім шығарды.

Айыпталушылар - төрт әйел және екі ер адам Қылмыстық кодекстің 264-бабының 1-бөлігі ("Трансұлттық ұйымдасқан топты, трансұлттық қылмыстық ұйымды құру және оларға басшылық ету, сол сияқты оларға қатысу") және 309-бабының 3-бөлігі ("Қылмыстық топ жасаған жеңгетайлық және жезөкшелікпен айналысу үшін притондар ұйымдастыру немесе оларды ұстау") бойынша кінәлі деп танылды. Сондай-ақ фигуранттардың бірі заңсыз кәсіпкерлікпен айналысқаны және қылмыстық жолмен алынған ақша мен мүлікті заңдастырғаны үшін сотталды.

Трансұлттық ұйымдасқан топтың басшысына 10 жылға дейін бас бостандығынан айыру жазасы тағайындалды, ал бес негізгі менеджердің әрқайсысы сегіз жылға бас бостандығынан айырылды.

Үкім заңды күшіне енген жоқ.

"Аталған қылмыстық іс бойынша жедел-іздестіру шаралары жалғасып жатыр. Сайттың қызметіне қатысы бар тағы бір бойжеткен Грузияда ұсталды, қазір оны Қазақстанға экстрадициялау жұмыстары дайындалып жатыр. Жедел уәкілдер, тергеушілер мен криминалистер қылмыстық схеманың барлық қатысушыларын анықтау бойынша жұмысты жалғастырып жатыр", - деп түйіндеді СҚО ПД баспасөз қызметі.

"Қыздар.нет" сайтының артында кім тұрды және онда қандай қаражат айналыста болғанын ІІМ айтып берді

Еске сала кетейік, осы жылдың маусым айында ІІМ қызметкерлері "Қыздар.нет" интернет-ресурсының серверлік инфрақұрылымын ұйымдастырушылар мен бенефициарларын ұстаған болатын. Ресми мәліметтер бойынша, сайтта интимдік қызмет көрсету туралы 9000-ға жуық сауалнама орналастырылған, оның 500-ден астамы – дәстүрлі емес жыныстық бағыттағы тұлғалар мен трансвеститтердің сауалнамалары. Тергеу барысында фигуранттардың IT-компаниялардың бірінің негізін қалаушылар екені анықталды.

Тергеу болжамы бойынша, сайттан түскен табыс айына 500 миллион теңгеден асуы мүмкін екен, операциялардың бір бөлігі криптовалюта арқылы жүргізілген.

Тінту барысында мыналар тәркіленді:

- 144 миллион теңге қолма-қол ақша,
- 1,3 миллион доллардан астам қаражат,
- криптовалютадағы 300 мың доллардан астам сома,
- оқ-дәрілері бар қару-жарақ,
- 150-ге жуық компьютерлік және өзге де техника, автокөлік құралдары,
- іс бойынша құжаттар мен басқа да дәлелдемелер тәркіленді.

Анықтама: Анықтама: Сайттың "айнасы" - басқа серверлерде орналасқан негізгі ресурстың дәлме-дәл көшірмесі. Мұндай көшірмелер пайдаланушыларға бұғаттауды айналып өтуге мүмкіндік береді, бірақ оларға қол жеткізу жиі шектеулі немесе VPN пайдалануды талап етеді.