Көкшетау, Семей мен Өскемендегі ЖЭО лар құрылысы басталды ма оператор жауабы

АСТАНА, 28 қазан – Sputnik. "Самұрық-Энерго" АҚ басқарма төрағасы Қайрат Мақсұтов үш қаладағы жылу электр станцияларының құрылысы жайында айтып берді, деп хабарлайды Sputnik Қазақстан тілшісі.

Көкшетаудағы жылу электр орталығының құрылысы бойынша жобалау, жабдықтау, жабдықтарды жеткізу және құрылыс жұмыстарына қатытсы шарттар жасалды.

"Қазіргі уақытта Көкшетау ЖЭО құрылысы үшін алаңды таңдау, жобалық-сметалық құжаттарды әзірлеу және жабдық өндірушілермен шартқа отыру жұмыстары жүргізіліп жатыр. Бұл жобада таза көмір технологияларын қолдану көзделген және станция 2029 жылы пайдалануға берілгеннен кейін біз 240 Мегаватт электр және 520 Гигакалория жылу қуатын беретін боламыз", - деді Мақсұтов үкіметтің бүгінгі отырысында.

Ал Семей мен Өскемен ЖЭО-лары бойынша энергетика министрлігімен инвестициялардың қайтарымын қамтамасыз ету мақсатында құрылыс жүргізуге келісімшарттар рәсімделді.

"Осы қалаларда станциялардың қуаттылығы 360 Мегаватт және 1000 Гигокалория болады. 2029 жылы пайдалануға беру жоспарланған", - деді "Самұрық-Энерго" басшысы.