​Көкшетауда 152 млн теңге субсидия жымқырған екі азамат сотталды

Көкшетау қаласында агроөнеркәсіп кешені субъектілеріне бөлінген мемлекеттік субсидияларды жымқыру дерегі бойынша сот үкімі жарияланды. Істі Қаржылық мониторинг агенттігінің Ақмола облысы бойынша департаменті тергеді.

Тергеу материалдарына сәйкес, екі жыл бойы «МолПродЖаркаин» ӘКК директоры А.С. Ефимкина мен «Рассвет» шаруа қожалығының басшысы А.В. Маслов сүт және оны терең өңдеу өнімдерінің өндірісін арзандатуға арналған субсидияларды заңсыз алып келген.

Анықталғандай, «Рассвет» шаруа қожалығында мәлімделген көлемде сүт өндіруге жеткілікті мал басы болмаған. Соған қарамастан электрондық шот-фактуралар жүйесінде «МолПродЖаркаин» ӘКК-не 3 млн килограмнан астам шикі сүт жеткізілгені туралы жалған құжаттар рәсімделген.

Осы жалған мәліметтер негізінде сүтті сары май мен қатты ірімшікке өңдеу туралы есептер жасалып, уәкілетті орган өтінімдерді мақұлдағаннан кейін бюджет қаражаты кәсіпорынның есепшотына аударылған.

Мемлекетке келтірілген жалпы залал 152 млн теңгені құрады.

Тергеу барысында алынған субсидиялардың бір бөлігі жасыру мақсатында Ефимкинаның туысының депозиттік шотына аударылғаны анықталды. Кейін бұл қаржыға жалға беріліп, табыс табуға арналған мобильді ғимарат сатып алынған.

Сотқа дейінгі тергеу кезеңінде 6 жер учаскесіне, 4 пәтерге, 11 автокөлікке, мобильді ғимаратқа және өндірістік нысанға тыйым салынды.

Сот үкімімен А.В. Маслов пен А.С. Ефимкина 6 жыл 4 ай мерзімге бас бостандығынан айырылды. Мобильді ғимарат мемлекет кірісіне тәркіленді. Қалған мүлікке салынған тыйым азаматтық талап толық орындалғанға дейін сақталады.

Үкім заңды күшіне енді.

Бүгін, 09:49